Shöhret zakir lagérdiki tutqunlarning "Oqush" püttürüp, öylirige qaytqanliqini ilgiri sürdi

Muxbirimiz erkin
2019-12-09
Élxet
Pikir
Share
Print

Uyghur aptonom rayonluq rayonining re'isi shöhret zakir 9‏-dékabir béyjingda axbarat yighini ötküzüp, xitayning "Kespiy terbiyelesh merkezliri" namidiki lagérlarda tutup turuluwatqan tutqunlarning "Oqush" püttürüp öylirige qaytqanliqi, lékin yéngi terbiyelen'güchilerning bu lagérlargha dawamliq kirip-chiqip turidighanliqini bildürgen.

Roytérs agéntliqining xewer qilishiche, shöhret zakir yene gherb ellirining lagérlar heqqidiki tenqidlirini we amérikaning "Uyghur kishilik hoquq qanun layihesi" ni eyibligen. B d t we xelq'ara kishilik hoquqni qoghdighuchilar xitayning "Térrorluqqa" we "Esebiylikke" qarshi turush namida yighiwélish lagérlirigha soliwalghan 2 milyondek Uyghur we bashqa musulman tutqunlarni qoyup bérishni telep qilip kelgen. Amérika awam palatasi ötken hepte mutleq köp awaz bilen "Uyghur kishilik hoquq qanun layihesi" ni maqullighan. Qanun layiheside chén chüen'go bashchiliqidiki xitay emeldarlirini jazalash telep qilin'ghan. Mezkur qanun layihesi xitay da'irilirini qattiq sarasimgha sélip, xitay taratqulirida amérikagha qarshi omumyüzlük teshwiqat hujumi bashlan'ghanidi.

Roytérs agéntliqining bildürüshiche, shöhret zakir "Nöwette terbiyelen'güchilerning hemmisi püttürüp boldi. . . . . . . . Ular hökümetning yardimide muqim ishqa orunliship, turmush sapasi yuqiriqi kötürüldi" dégen. Uning qeyt qilishiche, "Shinjang kishilerning shexsiy arzusi asasida terbiyeleshni dawamlashturidiken, shundaqla terbiyelen'güchiler bu orunlargha erkin kirip-chiqip turidiken."

Xitay hökümiti hazirgha qeder bu lagérlargha qanchilik Uyghur qamalghanliqini ashkarilap baqmighan. Shöhret zakir chet'elning bu jehettiki perizini "Pütünley toqup chiqirilghan" dégen. U yuqiriqi sözlerni lagér shahitlirining guwahliq sözliride we kishilik hoquq teshkilatlirining doklatlirida xitayning lagérdiki nurghun tutqunlarni qamaqqa höküm qilip, türmilerge yötkigenliki, nurghun tutqunlarni zawut karxanilargha orunlashturup, mejburiy emgekke séliwatqanliqini ilgiri sürülüwatqan mezgilde qildi.

Toluq bet