Misir ayrodromida tutup qélin'ghan sidiqulla nurmemet qoyup bérilgen

Ötken hepte se'udi erebistan da'iriliri teripidin qayturuwétilip, misirning qahire ayrodromida tutup qélin'ghan sidiqulla nurmemetning qoyup bérilgenliki ilgiri sürüldi. Sidiqulla nurmemet 23‏-öktebir qahiredin uchup se'udi erebistanning jiddiy shehirige qon'ghanda, chégridin kirgüzülmigen. U, shu küni misirgha qayturuwétilip, qahire ayrodromigha qaytip kelgende tutup qilin'ghanidi. Uning qahirede tutup qélinishi uning se'udi erebistandiki uruq-tughqanlirida we kishilik hoquq teshkilatlirida, sidiqulla xitaygha qayturuwétilemdu? dégen endishe qozghighanidi. Lékin uning se'udi erebistandiki uruq-tughqanlirining 27‏-öktebir radiyomizgha bildürüshiche, u yekshenbe küni qoyup bérilip, uning 3 ayliq misirda turushigha ruxset qilin'ghan. Lékin, uning 3 aydin kéyinki ehwalining qandaq bolidighanliqi melum emes.

Xitay hökümiti 2017‏-yili 7‏-ayda misirdiki Uyghurlarni keng kölemlik tutqun qilip, bir qisim Uyghurlarni xitaygha qayturup bergen. Misir hökümitining bu herikiti kishilik hoquq teshkilatlirining we amérika bashchiliqidiki gherb döletlirining qattiq tenqidige uchrimighan. 1989‏-Yili xotende tughulghan sidiqullah nurmemet 2014‏-yili misirgha kélip, ezher uniwérsitétigha oqushqa kirgen. U 2017‏-yildiki tutqundin kéyin misirda yoshurunup yashawatqanidi. Melum bolushiche, sidiqullaning bu qétim qahire ayrodromida tutup qélinishigha b d t musapirlar mehkimisi arilashqan. U ilgiri b d t musapirlar mehkimisige iltimas sunup, ularning musapirliq salahiyitige érishken iken. Uning se'udi erebistandiki uruq-tughqanliri téléfon ariliq bildürüshiche, u ilgiri se'udi erebistan'gha kélip baqmighan bolsimu, lékin u ayrodromgha qon'ghanda se'udi tamozhna xadimi uning burun se'udi erebistan'gha bir qétim kelgenliki, shuning uning xitaygha oxshimaydighanliqini ilgiri sürüp, se'udigha kirishini ret qilghan we qahirege qayturuwetken. Uning qahire ayrodromigha chüshüpla se'udidiki uruq-tughqanliri bilen bolghan alaqisi üzülgenidi. Uning se'udidiki taghisining muxbirimizgha bildürüshiche, sidiqulla yekshenbe küni uninggha téléfon qilip, özining qoyup bérilgenlikini bildürgen.