Sin'gapor xitay nesillik bir amérika puqrasining sin'gaporgha qayta kirishini chekligen

Muxbirimiz jüme
2017-08-05
Élxet
Pikir
Share
Print

Sin'gapor hökümiti sin'gapordiki nopuzluq tetqiqat ornida xizmet qiliwatqan xitay nesillik bir amérika puqrasining chet'el jasusi ikenlikini ilgiri surup, uning sin'gaporgha qayta kirishini chekligen.

Amérika birleshme agéntliqining xewer qilishiche, sin'gapor ichki ishlar ministirliqi jüme küni élan qilghan uqturushida, amérika puqraliqidiki xwang jing isimlik bu tetqiqatchining melum bir döletning jasusluq organliri we jasusliri bilen hemkarlashqanliqi körsetken. 

Emma ularni, uning qaysi döletning jasusluq organliri bilen ishligenlikini sherhlimigen. 

Xewerge qarighanda, xwang jing sin'gapordiki nopuzluq ligu'angyaw ammiwi siyasetler institutining tetqiqatchisi bolup, u özining nopuzidin paydilinip tetqiqat ornida yuqirida körsitilgen namelum döletni yaqilaydighan pikirlerni ilgiri sürüshke bashlighan iken. 

Ministirliq uqturushida xwang jing we uning ayali yang shyupingning sin'gaporda menggülük turush imtiyazining bikar qilinip, ularning sin'gaporgha qayta kirishi cheklen'genlikini bildürgen. 

Xewerde körsitishiche, xongkongdin chiqidighan "Jenubiy xitay seher géziti" öz xewiride xwang bilen yuqiriqi qarar toghrisida söhbetleshkenlikini, emma uning özi heqqidiki bayanatta déyilgenlerning hemmisi inkar qilghanliqini bildürgen. 

Xewerde neqil élishiche xwang mundaq dégen: "Méni bir 'yat elning tesir payda qilish jasusi' dep békitish tolimu bimenilik. Eger shundaq iken, ular némishqa uning amérikimu yaki xitaymu-qaysi dölet ikenlikini démeydu?"

U yene özining adwokati we amérikining sin'gaporda turushluq elchixanisi arqiliq yardem isteydighanliqini qoshumche qilghan. 

Xewerde "Jenubiy xitay seher géziti" din neqil élip körsitishiche, xwang jing özining béyjing hökümitini yaqlaydighan maqalilirini xitayning ichi we sirtidiki metbu'atlarda élan qilish bilen tonulghan tetqiqatchi iken. 

Xewerge qarighanda, sin'gapor hökümiti bu heqtiki bayanatida xwang jingning sin'gapordiki dangliq we tesiri zor zatlar bilen qoyuq ariliship, ulargha yuqirida tilghan élin'ghan namelum dölet heqqidiki "Alahide nopuzgha ige melumatlar" ni yetküzgen we ularning shu namelum dölet heqqidiki meydanini özgertishke tirishqan. 

Xwang jingning ligu'angyaw ammiwi siyasetler institutining yuqiri derijilik xadimlirigha sin'gaporning tashqi siyasitige tesir körsitish qesti bilen bergen uchurliri sin'gapor hökümitidiki nopuzluq erbablargha yetküzülgen iken. 

Emma, bayanatta bu atalmish "Alahide nopuzgha ige melumatlar" ning qandaq melumatlar ikenliki héchqandaq sherhlenmigen.

Toluq bet