Amérikining gu'angjuda turushluq konsulxanisidin bir qanche xadim "Sirliq késellik" tüpeyli qayturup kélin'gen

Muxbirimiz irade
2018-06-07
Élxet
Pikir
Share
Print

Birleshme agéntliqining xewer qilishiche, amérika dölet ishliri ministirliqi amérikining gu'angjudiki konsulxanisidin birqanche diplomatiye xadimlirini "Sirliq késellik" sewebidin amérikigha qayturup kelgen.

Amérika dölet ishliri ministirliqining charshenbe küni kechte élan qilghan bayanatida mundaq déyilgen: "Xitayning gu'angju shehiride turushluq bir neper amérika konsulxana xadimining sirliq bir awaz sewebidin ménge zeximlinish hadisisi körülgenliki éniqlan'ghandin kéyin, ministirliqimiz xitaygha mexsus tébbiy ömek ewetip, konsulxana xadimliri we ularning a'ile ezalirini tekshürdi. Mezkur konsulxanidiki bir qanche neper diplomatiye xadimimizning salametlikini yenimu ilgirilep tekshürüsh üchün amérikigha qayturup kélindi."

Melum bolushiche, amérikining gu'angjudiki konsulxanisida xizmet qilidighan bir neper diplomatiye xadimi we uning a'ilisidikiler bultur yil axiridin bashlap qulaq tüwide ghelite bir awaz peyda bolghanliqini hés qilghan. A'ile ezalirining hemmiside binormal bash aghriqi körülgendin kéyin, u bu ehwalni amérikining béyjingdiki bash elchixanisigha we washin'gtondiki amérika dölet ishliri ministirliqigha uqturghan.

Bu ghelite ehwalning amérikining xitayda turushluq bashqa konsulxana xadimliridimu körülgenliki melum bolghandin kéyin, béyjingdiki amérika bash elchixanisi ötken ayda xitaydiki amérikiliqlarni sirliq awaz hujumidin agah bolushqa we bu heqte körülgen gheyriy-normal alametlerni derhal melum agahlandurghan idi.

2016-Yili amérikining kubadiki elchixana xadimliri we ularning a'ile tawabatliridin bolup 24 kishi sirliq awaz hujumigha uchrighan. Quliqigha ghelite awaz anglan'ghan bu kishilerde yénik derijide ménge zeximlinish körülgen bolup, ularda bash aghriqi, bash qéyish, qusush, anglash sézimini waqitliq yoqitish qatarliq alametler körülgen. Amérika terep buning bilen derhal kubadiki diplomatiye xadimlirini qayturup kelgen. Shuning bilen bir waqitta yene kubaning amérikida turushluq 16 neper diplomatiye xadimini chégradin qoghlap chiqarghan idi.

Amérika dölet ishliri ministiri mayk pompiyo ötken ay amérika dölet mejlisidiki bir guwahliq bérish yighinida qilghan sözide amérikining xitaydiki konsulxana xadimlirida körülgen bir qisim ghelite késellik alametlirining 2016-yili amérikining kubada turushluq elchixana xadimlirida körülgen alametler bilen oxshaydighanliqini bildürgen.

Amérika dölet ishliri ministirliqi charshenbe künidiki bayanatida nöwette amérikining xitay bilen kubadiki diplomatiye xadimlirigha élip bérilghan sirliq awaz hujumi arisida melum bir baghlinishning bar-yoqluqini dawamliq tekshürüwatqanliqini éytqan.

Xitay tashqi ishlar ministirliqining bayanatchisi xu'a chünying peyshenbe küni muxbirlarning bu heqtiki so'aligha jawab bérip, "Amérika terep bu yéngi ehwal heqqide biz bilen téxi resmiy alaqe qilmidi," dégen.

Mezkur sirliq awaz hujumining del amérika-xitay ikki dölet arisidiki tijariy tengpungsizliqlar talash-tartishi yuqiri pellige kötürülgen, amérika jenubiy déngizning xelq'ara erkin déngiz sepirige ochuq bolush mesiliside xitaygha qaratqan bésimni kücheytken bir mezgilde yüz bérishi küchlük diqqet qozghimaqta.

Toluq bet