Үрүмчи даирилири чәтәлдә оқуп қайтқанларниңму сиясий ипадисини алған

Мухбиримиз җүмә
2017-05-14
Share


Чәтәлләрдә оқуватқан уйғур оқуғучиларниң хитайға қайтишқа мәҗбурлиниватқанлиқи муназирә қозғиған бир пәйттә, үрүмчи даирилири пәйшәнбә күни чәтәлдә оқуп қайтқанлар вә нөвәттә чәтәлдә яшаватқанларниң "вәкиллири" ни бир йәргә йиғип, уларниңму аталмиш "үчни сөйүш, үчкә қарши туруш" тики ипадисини алған.

Йиғинға үрүмчи шәһәрлик бирликсәп бөлүминиң башлиқи әкбәр турғун риясәтчилик қилған вә "җәмийәт муқимлиқи вә узақ муддәтлик әминликини ишқа ашуруш" үчүн чәтәлдә оқуған вә нөвәттә чәтәлдә яшаватқанларниңму ярдимигә моһтаҗ икәнликини билдүргән.

Хитай даирилири йеқиндин буян уйғур елидә ишлитиватқан шоарларниң бири "үчни союшуш, үчкә қарши туруш" болуп, булар "партийәни қизғин сөйүш, дөләтни қизғин сөйүш, җуңхуа чоң аилисини қизиғин сөйүш, бөлгүнчиликкә қарши туруш, әсәбийликкә қарши туруш, зораванлиққа қарши туруш" қатарлиқни көрситиду.

11-Майдики йиғинға риясәтчилик қилғанлардин тартип, ипадә билдүргәнләргичә болғанларниң ичидиму уйғурлар асасий салмақни игиләйду.

Йиғинда сөз қилған үрүмчи шәһәрлик муһаҗирлар ишханиси мудири әсәт һошур ипадә билдүрүп, милләтләр иттипақлиқи еңини қениға, күндилик турмушиниң һәр бир қатлимиғичә сиңдүридиғанлиқи һәққидә вәдә бәргән.

Шинҗаң педагогика университети чәтәл тили институти дотсенти әнвәр рози өзиниң әқил параситигә тайинип, "‹үч хил күч' ниң рәзил әпти-бәширисини вә қәбиһ нийити ечип ташлайдиғанли" қини билдүргән.

Чен чүәнго уйғур елигә йөткәлгәндин кейин, һәр саһә уйғурлирини мәркәз қилған асаста уларни "үч хил күч" ни сөкүшкә вә хитай компартийәсиниң "меһри шәпиқини мәдһийиләш" кә орунлаштуруп келиватқан иди.

Өткән һәптә радиомиз игилигән учурларда түркийә, мисир, һәтта америка, австралийә қатарлиқ әлләрдә оқуватқан уйғур оқуғучиларниң юртиға қайтишқа мәҗбурланғанлиқи дәлилләнгән. Радиомиз зияритини қобул қилған бәзи уйғур оқуғучилар бир қисим тонушлириниң юртиға қайта-қайтмай түрмигә ташланғанлиқини билдүргән иди.

Бу хәвәр елан қилинғандин кейин хәлқара ахбарат вә иҗтимаий таратқуларда зор ғулғула қозғиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт