Uyghur élide "Shi jinpingning muhim sözini öginish" témisidiki yéngi bir nöwetlik siyasiy dolqun kötürülgen

Muxbirimiz irade
2019-11-05
Élxet
Pikir
Share
Print

Uyghur aptonom rayonida "Shi jinpingning muhim sözini öginish, izchillashturush" témisidiki yéngi bir nöwetlik siyasiy dolqun kötürülüwatqanliqi melum bolmaqta.

Tengritagh tori qatarliq hökümet taratqulirida tarqitilghan xewerlerdin qarighanda, 4-noyabir küni Uyghur aptonom rayonluq siyasiy kéngesh mexsus "Partiye 19-nöwetlik merkiziy komitéti 4-omumiy yighini" ning rohini öginish yighini achqan bolup, xewerdin qarighanda yighinda yene "Junggo kommunistik partiyesi we junggoche sotsiyalizmni siyasiy jehette qelbtin étirap qilish, idiye jehette qelbtin étirap qilish, nezeriye jehette qelbtin étirap qilish, héssiyat jehette qelbtin étirap qilishni üzlüksiz kücheytip, junggoche sotsiyalizmning siyasiy tereqqiyat yolida qet'iy tewrenmey méngish kérek" dégenler telep qilin'ghan.

Xitay hökümiti nöwette Uyghur élide yolgha qoyuwatqan éghir kishilik hoquq depsendichiliki, lagér tüzümi we shundaqla xongkongdiki namayishchilargha qaratqan zorluq-zombuluqi seweblik xelq'arada küchlük tenqidlerge uchrimaqta. Yéqindin buyan amérika hökümitimu shi jinping hakimiyitige qaratqan tenqidlirini qattiq kücheytip, xitayni tizginleshni dunyaning bixeterliki üchün zörür, dep körsetkenidi. Del mushundaq bir peytte xitay hökümitining 4-omumiy yighin we uning rohini yetküzüsh yighinlirini chaqirip, hedep partiye bilen idiyede we pikirde birdeklikni saqlashni tekitlishi diqqet qozghaydiken.

Melum bolushiche, yuqiridikidek "Partiye 4-omumiy yighinining rohini yetküzüsh, shi jinping sözining rohini öginish" yighinliri xitay xelq armiyesining Uyghur élide turushluq qisimlirida we shundaqla herqaysi wilayet-nahiyelerde ayrim-ayrim omumlashturulghan. Bu heqtiki xewerlerde "-4Omumiy yighinining rohi shinjangda turushluq azadliq armiye we qoralliq saqchi qisimdiki ofitsér-eskerler arisida qizghin inkas qozghidi. Keng ofitsér-eskerler bes-beste tüzüm ishenchini chingitip, sadiqliq bilen chégrani muhapizet qilish. . . Heqqide qesem berdi" déyilgen. Aqsu axbarat torida bu heqte tarqitilghan xewerde bolsa "Shi jinpingning yéngi dewr junggoche sotsiyalizm idiyesi, yéngi dewrdiki shinjangning partiyeni idare qilish tedbirini chongqur öginip, qizil génni 'qan tomur' gha singdürüsh kérek" dégen sho'ar otturigha qoyulghan.

Toluq bet