Уйғур елидә сиясий-идийә тәшвиқати омумйүзлүк күчәйтилмәктә

Мухбиримиз ирадә
2016.12.15

Хәлқ торидин берилгән хәвәрдин қариғанда, уйғур аптоном район даирилири 13-декабир күни кучада “асасий қатлам аммиви хизмити” бойичә нәқ мәйдан йиғини ечип, хитай партийәси мәркизий комитетиниң “шинҗаң” ни идарә қилиш омумий тәдбирини омумлаштурушни, асасий қатламни чиң тутуп, муқимлиқ вә әбәдий әминлик һулини пухтилашни тәләп қилған.

Даириләр буниң үчүн асасий қатламларға һәр дүшәнбә күни дөләт байриқи чиқириш, аммиға тәшвиқ қилиш вә тәрбийә бериш йиғинлирини көпәйтиш, кадирларниң аилиләрни зиярәт қилишини чоңқурлаштуруш, йеза, кәнтләрдә мәдәнийәт- тәнтәрбийә паалийити тәшкилләш, аммини партийәниң сөзини аңлаш, партийәгә әгишип меңишқа тәрбийәләш вә йетәкләш қатарлиқ тәдбирләрни ишқа селишни буйриған.

Уйғур елидә йеқиндин буян юқиридикигә охшаш һәр түрлүк сиясий тәшвиқат паалийәтлири интайин көпийип кәткән болуп, йәрликтин игилигән учурларда йәрлик даириләрниң “дини радикаллиққа қарши туруш” дегән нам билән аһалиләрни усул ойнаш, арғамча тартиш, челишиш дегәндәк паалийәтләргә мәҗбурий уюштуруватқанлиқи мәлум болған. Хәлқара мәтбуатлар бу һәқтики хәвәрлиридә тибәт аптоном районини башқуруштики қаттиқ қол сиясәтлири билән тонулған чен чүәнгониң өз тәҗрибилирини уйғур елидиму ишқа селип, вәзийәтни йәниму бир қәдәм чиңитивәткәнликини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.