Uyghur élide siyasiy-idiye teshwiqati omumyüzlük kücheytilmekte

Xelq toridin bérilgen xewerdin qarighanda, Uyghur aptonom rayon da'iriliri 13-dékabir küni kuchada “Asasiy qatlam ammiwi xizmiti” boyiche neq meydan yighini échip, xitay partiyesi merkiziy komitétining “Shinjang” ni idare qilish omumiy tedbirini omumlashturushni, asasiy qatlamni ching tutup, muqimliq we ebediy eminlik hulini puxtilashni telep qilghan.

Da'iriler buning üchün asasiy qatlamlargha her düshenbe küni dölet bayriqi chiqirish, ammigha teshwiq qilish we terbiye bérish yighinlirini köpeytish, kadirlarning a'ililerni ziyaret qilishini chongqurlashturush, yéza, kentlerde medeniyet- tenterbiye pa'aliyiti teshkillesh, ammini partiyening sözini anglash, partiyege egiship méngishqa terbiyelesh we yéteklesh qatarliq tedbirlerni ishqa sélishni buyrighan.

Uyghur élide yéqindin buyan yuqiridikige oxshash her türlük siyasiy teshwiqat pa'aliyetliri intayin köpiyip ketken bolup, yerliktin igiligen uchurlarda yerlik da'irilerning “Dini radikalliqqa qarshi turush” dégen nam bilen ahalilerni usul oynash, arghamcha tartish, chélishish dégendek pa'aliyetlerge mejburiy uyushturuwatqanliqi melum bolghan. Xelq'ara metbu'atlar bu heqtiki xewerliride tibet aptonom rayonini bashqurushtiki qattiq qol siyasetliri bilen tonulghan chén chü'en'goning öz tejribilirini Uyghur élidimu ishqa sélip, weziyetni yenimu bir qedem chingitiwetkenlikini bildürmekte.