Уйғур аптоном районлуқ сиясий кеңәшниң сабиқ муавин рәиси парихорлуқ билән әйибләнгән

“хитай хәвәрлири тори” ниң 12-феврал бәргән хәвиригә қариғанда, уйғур аптоном районлуқ сиясий кеңәшниң сабиқ муавин рәиси до вәнгуй парихорлуқ җинайитигә четилип тәкшүрүлгән.

До вәнгуй җяңсулуқ хитайлардин болуп, уйғур елидә узун йил хизмәт қилған; у илгири кейин болуп, толи наһийәлик парткомниң секретари, турпан вилайәтлик партком тәшвиқат бөлүминиң башлиқи, ақсу вилайәтлик парткомниң секретари, 2018-йили уйғур аптоном районлуқ сиясий кеңәшниң муавин рәиси болған. Хәвәрдә дейилишичә, до вәнгуй толи наһийәсидә һоқуқ тутқан вақтидин башлапла пара йәп, зор миқдарда байлиқ топлиған; 2024-йил 3-айда тәкшүрүлгән; 10-айда компартийәдин қоғлинип, хизмитидин һәйдәлгән.

Хитай компартийә әзалиридики чириклик до вәнгуйдиму толуқ ипадиләнгән болуп, у кан ечиш һоқуқини башқиларға бериш, қурулушни һөддигә бериш, кадир өстүрүш җәрянида башқилардин зор миқдарда пул вә башқа мал-мүлүкләрни алған. Йәни “партийәниң муһим сиясәтлирини әмәлийләштүрүш” намида пурсәттин пайдилинип нәп үндүргән, һоқуқпәрәсләргә мәнсәп сатқан.

Уйғур елидики хитай әмәлдарлирида чириклик, парихорлуқ интайин еғир болуп, бу хәвәрдиму, 2024-йил 1-айғичә интизам тәкшүрүш органлири тәрипидин 23 миңдин көп әмәлдарниң җинайитиниң тәкшүрүлгәнлики, өткән йилдики охшаш нисбәттин 34 пирсәнткә йеқин ашқанлиқи, буниң ичидә өлкә дәриҗилик әмәлдарниң 30 ға йәткәнлики мәлум қилинған.

Радийомизға бу һәқтә сөз қилған хитай вәзийити анализчилиридин хупиң, тең бияв қатарлиқлар хитай әмәлдарлириниң һәммисидә дегүдәк чирикликниң мәвҗут икәнликини, пәқәт әмәлдарлиқ сәһнисидә иши оңдин кәлмигән әмәлдарларниңла моллақ атидиғанлиқини, омумән, хитай компартийәси йоқалмиғучә чирикликниң йоқалмайдиғанлиқини билдүрүп кәлмәктә.