Erkinlik sariyi xelq'ara jama'etni chaghanni xitay türmiliride ötküzüwatqan siyasiy mehbuslarni untup qalmasliqqa chaqirdi

Xelq'araliq kishilik hoquq orgini bolghan “Erkinlik sariyi” 5-féwral “Xitayning chaghinida siyasiy mehbuslarning a'ile tawabi'atliri kölengge astida” namliq bir bayanat élan qilip, xelq'ara jama'etni chaghanni xitay türmiliride ötküzüwatqan siyasiy mehbuslarni untup qalmasliqqa chaqirdi.

Uningda8-féwral küni bashlinidighan chaghan bayrimida milyonlighan xitay puqralirining a'ile tawabi'atliri bilen jem bolup bayram ötküzidighanliqi, emma türmide yétiwatqan shundaqla yéqinqi bir qanche heptidin buyan qolgha élin'ghan siyasiy mehbuslar we ularning a'ile tawabi'atlirining bolsa bundaq bir pursettin mehrum ikenliki bayan qilindi. Ular bu siyasiy mehbuslarning peqetla perqliq siyasiy we diniy köz qarashliri tüpeylidinla “Jinayetchi” dep qarilinip, a'ilisidin, söygenliridin uzaq qélishqa mejbur boluwatqanliqini bildürdi.

Erkinlik sariyi tiwittir tori arqiliq yene, türmidiki siyasiy mehbuslar we ularning a'ililirige bayramliq salam yollash pa'aliyiti bashlatqan bolup, uningda xitay öktichi, nobél mukapati sahibi lyu shawbo, Uyghur ziyaliysi ilham toxti, shundaqla téxi yéqinda Uyghur élidiki sot da'iriliri teripidin “Dölet hakimiyitini aghdurushqa urunush” jinayiti bilen eyiblinip, 19 yilliq qamaq jazasigha höküm qilin'ghan xitay pa'aliyetchisi jang xeytaw qatarliq siyasiy mehbuslarning ismi yer alghan.

Erkinlik sariyi bayannamiside, xitaydiki we dunyadiki barliq kishilik hoquq terepdarlirini chaghan mezgilide bu siyasiy mehbuslarni untup qalmasliqqa, ularning a'ile-tawabi'atliridin hal sorap, ulargha rohiy jehettin medet bolushqa chaqirghan.