Даириләр келәр йили хитай өлкилиригә әвәтилидиған оқуғучиларға сиясий шәрт қойған

Уйғур аптоном районлуқ адәм күчи байлиқи вә иҗтимаий капаләт назарити алдинқи һәптә баянат елан қилип, 2017-йили уйғур дияридин 4000 нәпәр студентни хитай өлкә, шәһәрлиригә давамлиқ тәрбийилинишкә әвәтидиғанлиқини билдүргән иди.

Игилинишичә, аталмиш “шинҗаңға нишанлиқ ярдәм бериватқан өлкә, шәһәрләр” гә әвәтилип давамлиқ тәрбийәлинидиған студентларни таллашта уларниң кәспий билим сәвийәсидин башқа йәнә, сиясий-идийә әһвалиға алаһидә шәрт қоюлидикән. Болупму, хитай даирилири уйғур елида күчәп тәшвиқ қиливатқан “җуңгони вәтиним дәп тонуш”, “җуңхуа миллитини тонуш”, “җуңхуа мәдәнийитини тонуш”, “җуңго компартийәсини тонуш” вә “җуңгочә сотсиялизмни тонуш” тин ибарәт “бәшни тонуш” ни алаһидә сиясий өлчәм қилидикән.

Көзәткүчиләр, даириләрниң райондики йәрлик милләт оқуғучилирини ишқа орунлаштурушта алди билән уларниң сиясий идийәсини қизиллаштуруш һәмдә хитай өлкилиридики аталмиш “давамлиқ тәрбийә” арқилиқ уларниң меңисини ююш тактикисини ишқа селиватқанлиқини тәкитлимәктә.