Xitayning amérika bilen bolidighan soda urushidin tépirlawatqanliqi melum bolmaqta

“Wal-strét zhurnili” gézitining 5-marttiki obzor maqalisidin melum bolushiche, xitay hökümiti amérika bilen bolidighan soda urushining özlirini eyni waqittiki sowét ittipaqidek halak qiliwétishidin bekmu zor endishe qilishqa ötken.

Obzorda éytilishiche, donald tramp pirézidéntliq saylimida ghelibe qilghan künning özidila bu endishe bashlan'ghan. Ehwaldin xewerdar kishilerning bildürüshiche, shi jinping shu waqittila öz yardemchilirini eyni waqittiki amérika-sowét ittipaqi otturisida yillap dawam qilghan “Soghuq urush” ning tepsilatigha qaytidin qarap chiqishqa buyrughan. Chünki shi jinping özlirining eyni waqittiki sowét ittipaqining ornigha chüshüp qélishidin bekmu zor endishide bolup kelgen. Bolupmu soda urushining chuqanliri otturigha chiqipla amérika hökümitining méksika we kanada, shundaqla yawropa döletlirini bu mesilide endishige salghanliqi xitaygha rawrus tesir körsetken.

Aptorning qarishiche, xitay nöwette ichki jehette iqtisadiy sahelerde halsirap qéliwatqanliqtin, shi jinping izchil mudapi'e körüsh ornida turup qalmaqta iken. Shunga xitay hökümiti xelq'ara soda sistémisidin paydilinip özlirining nöwettiki iqtisadiy qiyinchiliqini hel qiliwélishqa bekmu éhtiyajliq iken. Bundaq ehwalda amérika hökümitining soda urushini yéngi pellige élip chiqishi, shübhisizki xitaygha bekmu ziyanliq aqiwetlerni élip kélishi muqerrer iken. Aptor mushu ehwallarni bayan qilip, “Bu yalghuz soda urushila emes. Dunyadiki ikki zor iqtisad sahibi hazir buning xitay üchün némidin dérek béridighanliqini bekmu yaxshi chüshinidu: bu ‛soghuq urush‚ dewridin buyan körülüp baqmighan zor küchler kürishi bolup, buning pütün mezmuni iqtisad, téxnologiye we dunyawi siyasiy jughrapiye mesilisige bérip taqilidu” deydu. Shundaqla bu sahelerning hemmisidila amérika üstünlükni saqlap kelgenlikini eskertidu.

Alaqidar mutexessisler hazir amérika hökümitining ottura sherq we ukra'inadiki mesililerni axirlashturup, pütün diqqitini xitaygha merkezleshtürmekchi boluwatqanliqini tekitlewatqan bolup, rosiye bilen amérika otturisidiki düshmenlikning peskoygha chüshüshimu del mushu xil yüzlinishning netijisi, dep qariliwatqanliqi melum.