Iqtisadshunas marshal arbak xitayning soda urushida utturghanliqini ilgiri sürdi

Muxbirimiz shöhret hoshur
2018-10-31
Élxet
Pikir
Share
Print

Bügün "Asiya waqti" gézitide maqale élan qilghan iqtisadshunas marshal arbak (Marshal Auerback) nöwette amérika bilen xitay otturisida dawamlishiwatqan soda urushida xitayning utturuwetken terep bolup qalghanliqini otturigha qoyghan.

Maqalida déyilishiche, xitayning bu yilliq 3‏-pesildiki iqtisadiy yüksilish nisbiti 6.5 Pirsent bolghan bolup, 2017‏-yilidin buyanqi eng töwen baldaqqa chüshken. Amérika iqtisadi bolsa shiwétsariyediki bir nopuzluq tetqiqat ornining ilmiy bahalishida qaytidin dunya boyiche iqtisadiy riqabet iqtidari eng yuqiri bolghan 10 döletning birinchisi bolup bahalan'ghan.

Marshal arbekning bügünki maqaliside eskertilishiche, bu san xitay hökümet terep özi élan qilghan san bolup, xitay terepning istatéstika ishlirida teshwiqatchiliq qilish, reqemlerni özgertish en'enisi közde tutulidighan bolsa xitay iqtisadining bu yilliq yüksilish nisbitidiki emeliy reqem 6.5 Pirsenttinmu töwen bolushi mumkin iken. Aptor bu maqaliside xitay terepning iqtisadiy jehettiki bir qatar tedbirlirining kargha kelmigenlikini, emdilikte ularning donald tramp hökümitining ottura mezgillik saylamda texttin chüshüshini we uning ornigha démokratik partiyedin birining hakimiyet béshigha chiqishni ümid qiliwatqanliqini isharetligen.

Maqalida xitay terepning pul qimmitini dawamliq halda monopol qilish, amérikidin mustesna bir soda ittipaqi shekillendürüsh arqiliq nöwettiki soda urushida ghalip kelmekchi boluwatqanliqi, emma buning qisqa muddet ichide emelge ashurghili bolidighan bir layihe emseliki ilgiri sürülgen. Aptor maqaliside yene eger donald tramp hökümiti nöwettiki soda urushida iqtisadiy tedbirlirini chektin ashuruwetse, NATO we dunya soda teshkilatidiki ittipaqdashlirini qachurup qoyush éhtimalining tughulidighanliqi, iqtisadiy riqabette amérikining "Birinchi" emes, belki "Yalghuz" orun'gha chüshüp qalidighanliqi eskertilgen.

Toluq bet