Xitay teklip qilinmighan “Démokratiye yuqiri derijilik bashliqlar yighini” bashlandi, Uyghur qizi reyhan yighinda söz qildi

Amérika prézidénti jow baydinning sahibxanliqida orunlashturulghan “Démokratiye üchün yuqiri derijilik bashliqlar yighini” 9-dékabir küni, resmiy bashlandi.

Xelq'arada chiriklikke qarshi turushni, erkin we adil saylam sisitémi'isini qoghdashni we bu jehettiki yéngi teshebbuslarni élan qilishni pilanlan'ghan bu yighinning échilish murasimida prézidént jow baydin muhim söz qildi. U nöwette dunyaning herqaysi jaylirida démokratiye, uniwérsal kishilik hoquqning sijil we qorqunchluq xiris aldida turuwatqanliqini, bundaq bir peytte bu yighinni orunlashturush arqiliq démokratiyeni chongqur teshebbus qilishni zörür dep qarighanliqini éytti.

Jow baydén nutqida démokratiyening bir kéchidila peyda bolmaydighanliqi, uning dawamliq nazaret qilishqa, qoghdashqa we takammulashturushqa éhtiyaji barliqini bildürdi. U shundaqla amérikaning démokratiye ghayisining insanlarning ghoruri we erkin iradisi bilen yashash arzusini berpa qilish üstige qurulghanliqini eskertip turup, amérikaning dawamliq bu yönilishni qoghdashqa heriket qilidighanliqini éytti.

Eslide bu yighin bashlinishtin ilgirila amérika – xitay arisida bir meydan sürkülüshke seweb bolghan idi. Chünki dunyaning herqaysi jayliridiki démokratik döletler we shuni yaqilaydighan döletler rehberliri teklip qilin'ghan bu yighin'gha xitay we rosiye teklip qilinmighan, emma teywen teklip qilin'ghan idi.

Xitay hökümiti bolsa buninggha qattiq narazi bolup, bayanat élan qilip bir yaqtin amérikani “Ikki yüzlimichilik” bilen eyiblise yene bir yaqtin xitayningmu démokratik dölet ikenlikini jakarlap mesxirige qalghan.

S n n, b b s we eljezire qatarliq nopuzluq axbaratlar ayrim – ayrim halda “Xitay we rosiye baydinning démokratiye munbirigha hujum qildi”, “Munber aldida xitay bizmu démokratik dölet iduq, dédi” dégendek témilarda xewerlerni élan qildi.

Xitay teklip qilinmighan mezkur xelq'araliq munberge bolsa amérikadiki Uyghur adowkat we pa'aliyetchi reyhan eset prézidént baydénning teklipi boyiche qatniship söz qildi. Bu yighinning tepsilatini tepsili xewerler sehipimizde anglaysiler.