Amérika özining sün'iy eqil özeklirining xitaygha sétilishini chekleydighan qanunlirini chingitidiken

“Blumbérg xewerler tori” ning bildürüshiche, tramp hökümiti amérikaning dangliq sün'iy eqil özek layiheligüchisi bolghan Nvidia shirkitining xitaygha eng ilghar özeklerni sétishining aldini alidighan qoshumche cheklimiler üstide izdenmektiken. Bu yuqiriqi shirketning mexsus xitay üchün layiheligen sün'iy eqil yumshaq détali we mulazimitini tereqqiy qildurushta ishlitidighan özikini chekleshni meqset qilidiken.

Amérika hökümiti 2022-yilila qarar chiqirip, xitayning amérikaning sün'iy eqilni tereqqiy qildurushta ishlitilidighan eng ilghar kompyutér özeklirige érishishini chekligen idi. Halbuki, Nvidia shirkiti bu cheklimidin atlap ötüsh üchün, xitaygha ayrim özek layihelep sétishni dawam qiliwergen. Téxi bir qanche künning aldida xitayning tuyuqsiz otturigha chiqqan we amérika téxnika shirketlirining az dégende 1 tirilliyon dollarliq ziyan tartishigha seweb bolghan sün'iy eqil modéli “Téren tintish” (DeepSeek)ning del bu özeklerdin paydilinip yasalghanliqi ashkarilan'ghandin kéyin, amérikada küchlük munazire peyda qilghan idi.

Amérika kéngesh palata ezasi josh xowliy (Josh Hawley) bundaq ehwallarning tekrarlinishining aldini élish üchün, amérikaning xitay bilen herqandaq shekildiki yuqiri téxnika bayliqlirini almashturushni chekleydighan bir qanun layihesi tonushturghan. 29-Yanwar küni tonushturulghan bu qanun layihesi xitayning amérikaning sün'iy eqil téxnikisini import qilishini, amérika shirketlirining xitayda tetqiqat élip bérishini hemde amérikaning xitaydiki sün'iy eqil téxnika shirketlirige meblegh sélishini chekleydiken.

Josh xawléy bayanatida mundaq dégen: “Xitayning sün'iy eqil bayliqini tereqqiy qildurushigha yardem bériwatqan her bir dollar hemde herqandaq bir sanliq melumat axiri bérip amérikagha qarshi ishlitilidighanliqi éniq. Shunga amérika özining reqibini küchlendürmesliki kérek”.