Sam browénbék: “Xitayning shinjangda sün'iy eqil téxnikisini ishlitishi kélechektiki basturushning isharitidur”

Amérika tashqi ishlar ministirliqining xelq'ara diniy erkinlik bash elchisi sam browénbék xitayning Uyghur rayonida sün'iy eqil we d n a téxnikisini ishlitishining kélechekte Uyghurlarni basturushtiki bir jiddiy signal ikenlikini körsetken. Browénbék bu sözlerni yaponiye “Nikkéy” agéntliqining ziyaritini qobul qilghanda tekitligen.

U Uyghurlarning nöwettiki weziyitining “Zamaniwi dewrdiki bir tragédiye we misli körülüp baqmighan hadise” ikenlikini eskertip, xitayning insanlarni nazaret qilidighan yuqiri téxnikiliq bir sistéma qurghanliqi, pütün xelqning d n a ülgisini toplighanliqi, ularning yötkilishini chekleydighan bir ijtima'iy kridit sistémisi berpa qilghanliqini tenqidligen. Uning ilgiri sürüshiche, bu sistéma seweblik xitay kelgüside chetke qéqilghan téximu köp ademler topini peyda qilidiken.

Sam browénbék ijtima'iy kriditi nachar kishilerning bezi jaylargha seper qilalmaydighanliqi, bezi ishlargha orunlishalmaydighanliqini bildürüp, “Bu sistéma shu kishilerni iqtisadi we medeniyet pa'aliyetlerge qatnishalmay chette qélishigha élip baridu” dégen. U yene nöwette Uyghur rayonida bir milyondin artuq insanning tutup turush lagérlirigha qamalghanliqi heqqide toxtilip, amérikining qolida ghayib bolghan Uyghurlarning tizimliki barliqini, xitayning bu kishilerni derhal qoyuwétishi kéreklikini bildürgen. Browénbék yene xitayning Uyghurlarni basturushigha ishtirak qiliwatqan xitay shirketlirini jazalash mesilisi heqqidimu toxtalghan. Uning ilgiri sürüshiche, bu shirketler “Her waqit küntertipni igilep turuwatqan” bolup, “Her xil éhtimalliq mewjut” iken.