Хитайниң уйғур районида сүний һәмраһға қарши лазир нурилиқ мудапийә базиси қурғанлиқи ашкариланмақта

• Мухбиримиз шөһрәт һошур
  2019-04-03

Русийәниң “спутник” хәвәр торида мәлум қилинишичә, хитай уйғур районида сүний һәмраһға қарши лазир нурилиқ мудапийә базиси тәсис қилған.

Хитайниң уйғур районида сүний һәмраһға қарши лазир нурилиқ мудапийә базиси тәсис қилғанлиқи һиндистанлиқ пенсийәдики һәрбий мутәхәссис виянак бат тәрипидин байқалған. Виянакниң сүний һәмраһ көзитиши вә сүрәтлири үстидики анализиға асасән байқишичә, мәзкур база үрүмчиниң җәнубидин 233 километир узақлиқтики бир орунға җайлашқан.

Хәвәрдин мәлум болушичә, сүний һәмраһтин көзитишни суслаштуруш, тосуп қоюш вә һәтта бузуветиш ролини ойниялайдиған мәзкур лазир нурилиқ мудапийә базиси 4 бинадин тәшкилләнгән. Хәвәрдә йәнә әскәртилишичә, буниңдин икки айчә бурун америка һәрбий истиғбарати елан қилған бир доклатта хитайниң 2020‏-йилиниң ахириға қәдәр төвән орбиталиқ аләм көзитишигә қарши қуруқлуқта лазир нурилиқ мудапийә қураллири базиси қуруп чиқиши мумкинлики тилға елинған.

Мәзкур хәвәрдики бәзи тәпсилатлардин мәзкур базиниң уйғур райони вәзийитиниң ташқий дуня тәрипидин көзитилишиниң алдини елиши үчүнму ишлитилиш мумкинчилики барлиқ мәлум. Уйғур районида йиғивелиш лагерлири тәсис қилинғандин кейин ахбарат йоли билән учурға еришәлмигән бәзи көзәткүчиләр сүний һәмраһ көзитишидин пайдиланған. Канадалиқ оқуқучи шавин җаң сүний һәмраһ көзитиши арқилиқ бир қисим лагерларниң ениқ оринини тепип чиққан иди. Хитайму дәсләптә мәвҗутлуқини инкар қилған мәзкур лагерларни ахири етирап қилишқа мәҗбур болған иди.