Xitayning Uyghur rayonida sün'iy hemrahgha qarshi lazir nuriliq mudapiye bazisi qurghanliqi ashkarilanmaqta

• Muxbirimiz shöhret hoshur
  2019-04-03

Rusiyening “Sputnik” xewer torida melum qilinishiche, xitay Uyghur rayonida sün'iy hemrahgha qarshi lazir nuriliq mudapiye bazisi tesis qilghan.

Xitayning Uyghur rayonida sün'iy hemrahgha qarshi lazir nuriliq mudapiye bazisi tesis qilghanliqi hindistanliq pénsiyediki herbiy mutexessis wiyanak bat teripidin bayqalghan. Wiyanakning sün'iy hemrah közitishi we süretliri üstidiki analizigha asasen bayqishiche, mezkur baza ürümchining jenubidin 233 kilométir uzaqliqtiki bir orun'gha jaylashqan.

Xewerdin melum bolushiche, sün'iy hemrahtin közitishni suslashturush, tosup qoyush we hetta buzuwétish rolini oyniyalaydighan mezkur lazir nuriliq mudapiye bazisi 4 binadin teshkillen'gen. Xewerde yene eskertilishiche, buningdin ikki ayche burun amérika herbiy istighbarati élan qilghan bir doklatta xitayning 2020‏-yilining axirigha qeder töwen orbitaliq alem közitishige qarshi quruqluqta lazir nuriliq mudapiye quralliri bazisi qurup chiqishi mumkinliki tilgha élin'ghan.

Mezkur xewerdiki bezi tepsilatlardin mezkur bazining Uyghur rayoni weziyitining tashqiy dunya teripidin közitilishining aldini élishi üchünmu ishlitilish mumkinchiliki barliq melum. Uyghur rayonida yighiwélish lagérliri tesis qilin'ghandin kéyin axbarat yoli bilen uchurgha érishelmigen bezi közetküchiler sün'iy hemrah közitishidin paydilan'ghan. Kanadaliq oququchi shawin jang sün'iy hemrah közitishi arqiliq bir qisim lagérlarning éniq orinini tépip chiqqan idi. Xitaymu deslepte mewjutluqini inkar qilghan mezkur lagérlarni axiri étirap qilishqa mejbur bolghan idi.