D u q: "Xitayning qurban héytta sün'iy tebriklesh pa'aliyetlirini uyushturushi aldamchiliqtur"

Muxbirimiz erkin
2019-08-12
Élxet
Pikir
Share
Print

Xitay hökümiti bu yilliq qurban héytta Uyghur rayonining xoten, qeshqer, aqsu, korla, ürümchi qatarliq sheherliride puqralarni naghra-sunay chélish, sama oynashtek pa'aliyetlerge uyushturup, qurban héytni" xushal-xuram "Kütüwélishqa teshkilligen.

Xitay taratqulirida "Shinjangdiki her millet xelqining qurban héytni shad-xuramliq ichide tentene bilen kütüwalghanliqi" dep keng xewer qilindi. Lékin dunya Uyghur qurultiyining qarishiche, bu pa'aliyetler 2 milyondek Uyghurni yighiwélish lagérlirigha qamap, Uyghurlarning diniy étiqadini pütünley chekligen xitay hökümitining xelq'arani aldash üchün oydurup chiqarghan bir köz boyamchiliq herikiti iken.

D u q ning bayanatchisi dilshat rishit 12‏-awghust küni radiyomizda xitay taratqulirining qurban héyt heqqidiki xewerlirige reddiye bérip, bu pa'aliyetlerni Uyghurlarning öz ixtiyarliqi bilen élip barmighanliqi, bu pa'aliyetlerni hökümetning mejburiy teshkilligenlikini ilgiri sürdi. Dilshat rishitning qeyt qilishiche, xitay hökümiti qurban héytning aldida jaylargha uqturush chüshürüp, qurban héytta musulmanlarning kolléktip héytlishini chekligen iken. U ürümchi saybagh rayonluq hökümetning qurban héyt aldida chüshürgen uqturushida héyt petisi qilidighan kishilerning bina bashqurush hey'itige tizimgha aldurushi telep qilin'ghanliqini bildürdi.

Bu yilqi qurban héyt xitay hökümitining Uyghurlarni yighiwélish lagérlirigha keng kölemlik qamishi gherb döletlirining qattiq tenqidige uchrawatqan, amérika hökümiti chén chüen'go, ju xeylün qatarliq xitay emeldarlirini jazalashning yollirini izdewatqanliqini bildürgen bir waqitta yétip kelgen idi. Lékin "Tengritagh tori" qatarliq xitay hökümet taratqulirining xewerlerde, qeshqer xelqining héytgah meydanida naghra-sunay chélip, sama ussuli oynighanliqi shundaqla xoten, cherchen, shayar, jimisar, ürümchining tengritagh rayoni qatarliq jaylarda tebriklesh pa'aliyetlirining ötküzülüp, "Tengri téghining jenubiy we shimalini qaynam-tashqinliq bayram keypiyati qaplighanliqi" ilgiri sürülgen. Lékin héchbir xewerde birer musulmanning qoy soyup, qurbanliq qilghanliqi tilgha élinmighan.

Toluq bet