Türkiye, kémisi chöküp ketken süriyelik musapirlardin 200 din artuq kishini qutquzuwaldi, 22 jeset bayqaldi

Türkiyedin girétsiyege yolgha chiqqan süriyelik qanunsiz köchmenler olturghan bir kéme 15-séntebir küni ége déngizida chöküp kétip, 22 adem qaza qilghan. Türkiye metbu'atlirining xewer qilishiche, kéme chöküsh weqeside 4 balini öz ichige alghan 22 kishi qaza qilghan. Türkiye déngiz qutquzush etretliri weqe yüz bérip birqanche sa'et ichide déngizgha chöküp kétiwatqan kémidiki süriye musapirliridin 200 din köp qanunsiz köchmenni qutquzuwalghan.

Ötken heptidin buyan süriye musapirlirining yawropa döletlirige chégrani buzup qanunsiz köchüsh herikiti bashlan'ghan bolup, süriyediki urushtin qachqan musapirlar türküm-türkümlep her xil yollar arqiliq hayatliq izdep yawropa döletlirige qanunsiz köchmen bolup kirmekte.

En'gliye b b s agéntliqining 15 séntebirdiki xewiridin melum bolushiche, wén'giriye düshenbe küni qanun chiqirip, 15-séntebir seher sa'et 1 din bashlap sérbiye-wén'giriye chégrasidin qanunsiz kirgen süriye musapirlirini saqchilar arqiliq tosidighanliqini bildürgen. Bu qanun ijra qilinishtin ilgiri texminen 9000 süriyelik musapir wén'giriye kirgen. Xewerde déyilishiche, yawropa ittipaqi italiye, wén'giriye chégrasi ichidiki 40 mingdin artuq süriyelik musapirni yawropa döletlirige orunlashturidighanliqini bildürgen. Emma yene 120 din artuq süriyelik musapir mesilisi yawropa döletlirining béshini qaturghan mesilige aylan'ghan.