Teywen armiyesi “Qamalni buzush” manéwirigha jiddiy teyyarlanmaqta

25-Aprél küni teywen armiyesi xitay hökümiti orunlashturghan yéqinqi herbiy manéwirgha qarshi manéwir uyushturup, özlirining “Tosqunluq we qamalni bösüp tashlash” iqtidarini namayan qilidighanliqini bildürgen. Roytérs agéntliqining 26-apréldiki xewiride éytilishiche, bu hal teywen armiyesi qatnishish aldidiki manéwirning merkiziy témisi bolghan.

Xewerde éytilishiche, xitay armiyesi aldinqi heptide teywen arili etrapida “Dellik we qamal qilish” ni merkiziy téma qilghan üch künlük herbiy manéwir ötküzgen hemde shu arqiliq teywen prézidénti sey yingwénning amérika awam palatasining re'isi kéwin makkartiy bilen los anjélés shehiride söhbetleshkenlikige bolghan naraziliqini ipadiligen. 15-Mayda bashlinidighan bu manéwirda teywen armiyesi özlirining xitay armiyesi hasil qilidighan tosqunluqni buzup tashlash iqtidarigha ige ikenlikini namayan qilidighanliqini bildürgen. Teywen dölet mudapi'e ministirliqining 25-apréldiki muxbirlarni kütüwélish yighinida général lin wénxu'ang bu heqte söz qilip “Elwette bizning manéwirimiz teywen'ge tajawuz qilmaqchi bolghan kommunistlar peyda qiliwatqan tehditlerge qarshi turushni közleydu” dégen.

Teywen dölet xewpsizliki idarisining bashliqi sey mingyén özlirining bu qétimliq manéwirgha teyyarlinishi heqqide söz bolghanda buningdiki bir muhim qedem süpitide teywenning “Besh köz” istixbarat sistémisi bilen alaqe ornitip bolghanliqini, shunga teywen herbiy terepning barliq kompyutér sistémisi herqachan “Besh köz” sistémisi bilen ulaghliq halda bolidighanliqini bildürgen. “Besh köz istixbarat sistémisi” amérika, kanada, en'gliye, awstraliye we yéngi zélandiye otturisidiki istixbarat tori bolup, herbiy ishlar sahesi buningdiki muhim mezmunlardin sanilidu.