Xitay baydén hökümitining teywen'ge qoral-yaraq sétip bérishini “Ot bilen oynashqanliq” dep agahlandurghan

Amérika hökümitining 21-dékabir küni teywen'ge yene bir türküm qoral-yaraq sétip bérishni qarar qilishi, xitayning amérika bilen bolghan teywen mesilisidiki sürkilishini yenimu kücheytken. Xitay hökümiti nöwette baydén hökümitining teywen'ge qoral-yaraq sétip bérish qararini “Ot bilen oynashqanliq” dep dawrang salmaqta.

“Politiko” gézitining xewer qilishiche, pirézidént baydén 21-dékabir küni amérika dölet mudapi'e ministirliqining teywen'ge miqdari 571 milyon dollarliq herbiy lawazimat, telim-terbiye we mulazimet eslihelirini sétip bérishni testiqlighan. Buning aldida yeni 20-dékabir küni amérika dölet mudapi'e ministirliqi teywen'ge qoshumche 295 milyon dollarliq herbiy lawazimat sétip bérish pilanining testiqlan'ghanliqini élan qilghan idi.

Amérikaning xitay azadliq armiyesining üzlüksiz küchiyiwatqan herbiy tehditige qarshi teywenni qorallandurush qarari, teywen'ge igilik hoquq yürgüzüshni dawa qilip kéliwatqan béyjing hökümitini qattiq bi'aram qilghanliqi melum bolmaqta. “Politiko” gézitining bildürüshiche, xitay tashqiy ishlar ministirliqi 22-dékabir bayanat élan qilip, amérikadin teywenni qorallandurushni toxtitishni telep qilghan.

Xitay tashqiy ishlar ministirliqi élan qilghan bayanatida, teywen'ge qoral-yaraq sétip bérishtek “Teywen boghuzining tinchliqi we muqimliqigha buzghunchiliq qilidighan xeterlik heriket” ni toxtitishni telep qilidighanliqi bildürülgen. Halbuki, amérika teywen'ge qoral-yaraq sétish we uninggha yardem bérish xitayning 23 milyonluq nopusi bolghan bu démokratik aralni qoralliq bésiwélishini tosup, xitayning qoralliq tajawuzgha qarshi özini mudapi'e qilishigha yardem béridu, dep qarimaqta. Pirézidént baydén bu qétim teywen'ge 571 milyon dollarliq herbiy lawazimat sétip bérishni testiqlashtin burun, bu yil 9-ayda 567 milyon dollarliq herbiy lawazimat sodisini testiqlighan idi.

“Politiko” gézitining éytishiche, teywen tashqiy ishlar ministirliqi baydén hökümitining qararini qarshi alidighanliqini bildürüp, bu amérika hökümitining “Bizning mudapi'e mesilimizdiki wedisini ipadileydu” dégen.