Teywende tunji ayal prézidént saylandi

Muxbirimiz ümidwar
2016.01.18


Shenbe küni teywendiki prézidént saylimi netijiside, démokratiye ilgharliq partiyesidin kélip chiqqan namzat, doktor sey yingwén 60% awaz bilen ghelibe qilip, teywen tarixidiki tunji ayal prézidént bolup saylandi.

Buning bilen teywenni 8 yildin buyan idare qilip kéliwatqan gomindang partiyesi saylamda meghlup bolup, démokratiye ilgharliq partiyesining qaytidin teywenni idare qilish sehipisi échildi.

Amérika awazining yézishiche, sey yingwénning riqabetchisi gomindang partiyesidin ju lilün bolup, u saylamda meghlup bolghandin kéyin gomindang partiyisining re'isilik wezipisidin istipa béridighanliqini bildürgen.

Amérika dölet ishliri ministirliki bayanatchisi jon kirbi amérika qoshma shtatliri hökümitining doktor sey yingwénni teywen prézidént saylimidiki ghelibisi bilen tebirikleydighanliqini bildürdi.

Sey yingwén saylam ghelibisi heqqide toxtilip: “Bizning démokrartiye tüzümiz, dölet kimlik chüshenchimiz we xelqara atmosférayimiz choqum toluq hörmet qilinishi kérek, her qandaq bésim ikki qirghaq munasiwetlirining muqimliqigha buzghunchiliq qilidu” dégen.

Roytérsning xewer qilishiche, amérika aq saray bayanatchisi mylés kaggans aq sarayning sey yingwénning ghelibisini tebirikleydighanliqini bildürüp, “< Biz teywen xelqining yene bir qétim özlirining küchlük démokratiye tüzüm küchini körsetkenlikini tebrikleymiz. Biz teywen xelqi bilen birlikte dawamliq ikki qirghaqning tinchliqi we muqimliqidiki ortaq menpe'etimizni qoghdayniz” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.