Wilson merkizi gomidang hökümitining teywende qurghan "Sürgündiki shinjang hökümiti" ge da'ir bir qisim höjjetlirini ashkarilidi

Muxbirimiz qutlan
2016-08-27
Élxet
Pikir
Share
Print


Bash shitabi washin'gtondiki wilson tetiqat merkizi yéqinda "Soghuq urush" dewrige da'ir yéngi tetqiqat netijilirini élan qilghan.

Buning ichide Uyghur hazirqi zaman tarixi tetqiqati bilen shoghulliniwatqan musteqil tetqiqatchi justin jakobsning "1954 - Yilidin 1971 - yilighiche teywende pa'aliyet élip barghan sürgündiki shinjang hökümiti" namliq tetqiqat doklati alahide diqqet chékidu.

Melum bolushiche, eyni chaghda gomindang hökümiti sistémisida xizmet qilghan bir türküm Uyghur we qazaqlar 1949 - yilining axiri Uyghur élidin hindistanning keshmir rayonigha qéchip chiqqan. Ularning köp qismi muhemmet emin bughra we eysa yüsüp alptékinlerge egiship, 1950 - yillarning bashlirida türkiyege bérip olturaqlashqan. Emma yolwasbeg bashchiliqidiki bir qisim Uyghur we qazaqlar teywen'ge bérip gomindang hökümitige qoshulghan.

Uzun ötmeyla gomindang hökümiti teywende "Sürgündiki shinjang ölkilik hökümet ishxanisi" qurup, yolwasbegni re'is qilghan. Gomindang hökümiti eyni chaghda türkiyediki muhemmet emin bughra bilen eysa yüsüp alptékinlerge köp qétim mektup ewetip ularni teywen'ge kélishke ündigen. Gomindang hökümitining bu pilani ishqa ashmighandin kéyin, yolwasbeg bashchiliqidiki bir ömekni ottura - sherqqe ewetip, bughra we alptékinlerning sherqiy türkistan dewasini tosushqa urun'ghan.

Tetqiqatchi justin jakobsning mezkur doklatida yolwasbeg bilen muhemmet emin bughra we eysa ependilerning öz - ara yézishqan birqanche parche mektubi we ularning Uyghur diyarining kélechiki heqqidiki tartishmiliri orun alghan. Közetküchilerning qarishiche, mezkur doklat Uyghur élining hazirqi zaman tarixidiki bir qisim tügünlerni bilishte muhim yip uchliri bilen teminleydiken.

Toluq bet