Ley chingdé: “Xitayning teywen'ge hujum qilishtiki gherizi zémin pütünlüki emes”

Teywen pirézidénti ley chingdé 9-ayning 1-küni teywen téléwiziyesining mexsus ziyaritini qobul qilghanda söz qilip, xitayning teywenni élishtiki esli meqsitining xitay zéminini birlikke keltürüsh emes, belki dunya tertipini özgertish ikenlikini bildürgen.

Bu heqte ijtima'iy alaqe tori X da tarqalghan bir widiyoda ley chingdi riyasetchining so'aligha jawab bérip, “Démokratiye teywende yiltiz tartip güllendi. Teywenlikler barliqqa keltürgen démokratiyeni xitay hökümiti özlirige xiris dep qariwalmasliqi kérek. Xitayning teywenni bésiwélishtiki qesti men ley chingdi yaki melum bir partiye emes, xitayni birlikke keltürüsh üchünmu emes, eger xitayning meqsiti zémin pütünlüki bolidighan bolsa, némishqa hazir rusiye ajizlashqan pursette, eyni waqitta rusiye igiliwalghan zéminni qayturuwalmaydu. Xitayning teywen'ge hujum qilmaqchi bolushidiki gherizi xelq'ara nizam asasidiki dunya tertipini özgertish, özining dunyagha hakim bolush meqsitini emelge ashurush” dégen.

Ley chingdé yene tekitlep: “Xitay eger teywennila élishni közligen bolsa, jenubi déngizda herbiy kéngeymichilik qilip néme qilidu, rusiye bilen birleshme herbiy manéwir ötküzüp néme qilidu, shunga xitayning gherizi nahayiti éniq” dégen.

2022-Yil 9-ayda amérika merkiziy istixbarat idarisining mu'awin bashliqi dawid kohin (David Cohen) shi jinpingning xitay armiyesige 2027-yildin awwal teywen'ge hujum qilishqa teyyarlinishqa buyruq bergenlikini ashkarilighanidi.