Таҗикистан таҗик-афған чеграси әтрапида хитай һәрбий базиси қурушни тәстиқлиған

Мухбиримиз әркин
2021-10-27
Share

Таҗикистан хитайниң таҗикистан-афғанистан чеграси әтрапида йәнә бир һәрбий база қурушини тәстиқлиған. Бу һәқтики хәвәрләрдә ейтишиличә, бу хитайниң мәзкур районда өзиниң бихәтәрлик тәсирини кеңәйтиватқанлиқиниң әң йеңи ипадиси икән. Бу хитайниң таҗикистанда қурған тунҗи һәрбий базиси әмәс. Униң бурунму таҗикистанниң вахан каридориға йеқин мурғап районда һәрбий база қуруп, паалийәт елип бериватқанлиқи хәвәр қилинған.

"азадлиқ радийоси" ниң хәвәр қилишичә, таҗикистан парламентиниң төвән палатаси 27-өктәбир аваз берип, таҗикистан ички ишлар министирлиқи билән хитай җамаәт хәвпсизлик министирлиқи арисида имзаланған һәрбий база қуруш келишимини тәстиқлиған.

Таҗикистанниң 1-муавин ичкий ишлар министири абдурахман аләмшаһзадә һәрбий базиниң тағлиқ бәдәхшан аптоном областиниң вахан йезисида қурулудиғанлиқини ейтқан. "азадлиқ радийоси" бу һәқтики хәвиридә йәнә душәнбидики хитай әлчиханисиниң ташқий ишлар министирлиқиға йоллиған таҗикистан һөкүмитиниң бу дөләттики мәвҗут хитай һәрбий базисиниң толуқ контроллиқ һоқуқини униңға өткүзүп бериш, хитайниң һәрбий ярдими бәдилигә базиниң ‍иҗарә һәққини алмаслиқни тәклип қилғанлиқи һәққидики һөҗҗитини көргәнликини билдүргән.

Хәвәрдә ейтилишичә, бу һөҗҗәттә һәрбий базини хитайға өткүзүп бериш тәклипини хитай дөләт мудапийә министири вей феңхе бу йил 7-айда таҗикистанни зиярәт қилғанда президент имам әли рахманниң оттуриға қойғанлиқи ейтилған икән. Вей феңхе шу қетимлиқ зияритидә хитайниң таҗикистан билән "терорлуққа қарши" һәмкарлиқни күчәйтишни, "терорлуқ" һәрикәтлириниң чегра һалқишиниң бирликтә алдини елишни халайдиғанлиқини ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт