Tajikistan tajik-afghan chégrasi etrapida xitay herbiy bazisi qurushni testiqlighan

Tajikistan xitayning tajikistan-afghanistan chégrasi etrapida yene bir herbiy baza qurushini testiqlighan. Bu heqtiki xewerlerde éytishiliche, bu xitayning mezkur rayonda özining bixeterlik tesirini kéngeytiwatqanliqining eng yéngi ipadisi iken. Bu xitayning tajikistanda qurghan tunji herbiy bazisi emes. Uning burunmu tajikistanning waxan karidorigha yéqin murghap rayonda herbiy baza qurup, pa'aliyet élip bériwatqanliqi xewer qilin'ghan.

“Azadliq radiyosi” ning xewer qilishiche, tajikistan parlaméntining töwen palatasi 27-öktebir awaz bérip, tajikistan ichki ishlar ministirliqi bilen xitay jama'et xewpsizlik ministirliqi arisida imzalan'ghan herbiy baza qurush kélishimini testiqlighan.

Tajikistanning 1-mu'awin ichkiy ishlar ministiri abduraxman alemshahzade herbiy bazining taghliq bedexshan aptonom oblastining waxan yézisida quruludighanliqini éytqan. “Azadliq radiyosi” bu heqtiki xewiride yene dushenbidiki xitay elchixanisining tashqiy ishlar ministirliqigha yollighan tajikistan hökümitining bu dölettiki mewjut xitay herbiy bazisining toluq kontrolliq hoquqini uninggha ötküzüp bérish, xitayning herbiy yardimi bedilige bazining ‍ijare heqqini almasliqni teklip qilghanliqi heqqidiki höjjitini körgenlikini bildürgen.

Xewerde éytilishiche, bu höjjette herbiy bazini xitaygha ötküzüp bérish teklipini xitay dölet mudapiye ministiri wéy féngxé bu yil 7-ayda tajikistanni ziyaret qilghanda prézidént imam eli raxmanning otturigha qoyghanliqi éytilghan iken. Wéy féngxé shu qétimliq ziyaritide xitayning tajikistan bilen “Térorluqqa qarshi” hemkarliqni kücheytishni, “Térorluq” heriketlirining chégra halqishining birlikte aldini élishni xalaydighanliqini éytqan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar