Таҗикистан рәсмий рәвиштә киши фамилисидики русчә қошумчиларни ишлитишни чәклиди

Мухбиримиз үмидвар
2016-05-02
Share


Оттура асиядики сабиқ совет иттипақиниң йимирилиши билән мустәқил болған таҗикистан җумһурийити йеқинда рәсмий түрдә киши фамилә исимлириниң арқисиға қошулидиған русчә қошумчини ишлитишни чәклигән.

Русийәниң лента.Ру учур ториниң таҗикистан мәнбәлиридин нәқил елишичә, әрләрниң фамилиси ахириға қошулидиған русчә "ов", "ев", "ович" вә аялларниң фамилиси вә дадисиниң исминиң ахириға қошулидиған "ова" һәм "овна" қошумчилири қануний рәвиштә чәкләнгән. Униң әксичә, буниңдин кейин фамилиләр таҗикчә қошумчә, йәни"зод", "задә", "йән" вә "фар" қошумчилири қошуш арқилиқ ипадилинидикән.

Бу учурни таҗикистан җумһурийитиниң әдлийә саһәсигә мәнсуп юқири дәриҗилик әмәлдари җамалидин рәһимов мухбирларға билдүргән болуп, бу йил 1 - айда таҗикистан парламенти буниңға аит қанунни қобул қилған иди.

Лекин, җамалидин рәһимовниң ейтишичә, фамилә арқа қошумчилирини өзгәртиш таҗикларға қаритилған болуп, башқа хәлқләр өз адәтлири бойичә қалса болидикән

Буниңдин бир қанчә йил илгири таҗикистан президенти емамәли рахман өз фамилисидики русчә қошумчә "ов" ни елип ташлап, өзини рахманов әмәс, бәлки рахман дәп җакарлиған иди.

Киши фамилиси арқисидики русчә қошумчини бикар қилиш мәсилиси оттура асия җумһурийәтлири мустәқил болғандин кейин оттуриға чиққан болсиму, әмма һеч қайси җумһурийәт техи һазирғичә қәдәм басмиған иди. Қазақистан уйғурлар арисидиму русчә фамилә қошумчисини ташлаш пикирлири оттуриға чиқип, бир қисим кишиләр мундақ қәдәмни басқан болсиму, лекин омумлашмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт