Talibanlar bayanatchisi: “Sh t i h ning nurghun ezaliri afghanistandin ayrildi”

Afghanistan talibanlirining bayanatchisi suheyil shahin “Sherqi türkistan islam herkiti” ning nurghun ezlirining afghanistandin ayrilghanliqi, ulardin qélip qalghanlirining afghanistandiki herqandaq jayda turushigha yol qoyulmayghanliqini bildürgen. Suheyil shahin bu sözlerni 8-séntebir xitayning “Yer shari waqti” gézitige éytqan bolup, u buningdin burunmu talibanlarning Uyghur qoralliqlirigha afghanistanda yol qoymaydighanliqini bildürgen.

Suheyil shahin 8-séntebir ‍afghanistan'gha qoshna pakistan, tajikistan, iran, özbékistan, türkmenistan we xitay qatarliq döletler tashqiy ishlar ministirlirining ékran yighini ötküzülgen, yighinda xitay tashqiy ‍ishlar ministiri wang yi ‍afghanistan'gha 31 milyon dollarliq yardem buyumi béridighanliqini élan qilghan küni “Yer shari waqti” gézitining ziyaritini qobul qilghan.

U mundaq dégen: “Sherqiy türkistan islam herkitining nurghun ezaliri afghanistandin ayrildi. Chünki taliban ularni qet'iy agahlandurghan, qélip qalghanliridin herqandaq birsining afghanistandiki herqandaq bir jayda turushigha yol qoyulmaydu.”

Lékin amérikadiki “Heptilik xewerler” zhornilining bildürüshiche, xitay taliban'gha Uyghur qoralliqlirini basturush toghrisida bésim ishlitiwatqan bir peytte, “Türksitan islam partiyesi” bayanat élan qilip, “Amérikaning afghanistandin chékinishini xitaygha taqabil turushning pursiti” dep qarimaqta iken.

“Heptilik xewerler” zhornilining 10-séntebir bergen xewiride, “Türkistan islam partiyesi” ning bir bayanatchisi “Amérika küchlük dölet, uning özige xas istratégiyesi bar, biz bügün amérika hökümitining ghayet zor iqtisadiy ziyan'gha uchrap afghanistandiki bu urushtin chékinishini dunyadiki pütün insaniyet we dinlarning düshmini bolghan xitaygha qarshi turushning bir pursiti, dep qaraymiz,” dégen.