Талибан қундуздики ‍өзини партлитиш характерлик һуҗумни “афған” даишчи елип барғанлиқини билдүргән

Мухбиримиз әркин
2021.10.20
Share on WhatsApp
Share on WhatsApp

Талибанлар афғанистанниң қундуз шәһиридики бир шиә мәсчитидә йүз бәргән ‍өзини өлтүрүвелиш характерлик партлитиш һуҗумини “афған” даишчиниң қилғанлиқини илгири сүргән. Бу йил 15-өктәбир күни қундуз шәһиридики бир шиә мәсчити җүмә намизида өзини ‍өлтүрүвелиш характерлик һуҗумға учрап, 50 тин артуқ адәм ‍өлгән, 100 дин артуқ адәм яриланған. Вәқәдин кейин даишниң хурасан тәшкилати интайин ғәйрий рәвиштә баянат елан қилип, һуҗумға ‍өзлириниң мәсул икәнлики, һуҗумниң бир уйғур тәрипидин ишқа ашурлғанлиқини җакарлиған.

Үммәтчиликни принсип қилған вә һечқачан террорлуқ һуҗумлирида террорчиниң миллитини тилға алмайдиған даишниң бу қетим һуҗумчиниң миллитини алайитән елан қилиши, хәлқараниң диққитини қозғиған. Түркийәдики бәзи өктичи сиясийонлар даишчи уйғурниң сүрийәдин афғанистанға барғанлиқини илгири сүргәниди. Бирақ “америка авази” радиосиниң йеқинда хәвәр қилишичә, талибанларниң ахбарат вә мәдәнийәт министири зәбиһулла муҗаһит, һуҗумчиниң “афған” икәнликини билдүргән.

Зәбиһулла муҗаһит “америка авази” радиосиниң бир қетимлиқ зияритини қобул қилғанда мухбирниң “қундузда ‍өзини партлатқан адәм уйғур иди. Хитай силәргә әндишисини билдүрдиму? һуҗумдин кейин хитай силәргә немә, деди” дегән соалиға җаваб бәргән.

У, “биз бу мәсилидә һечбир дөләт билән сөзләшмидуқ. Даиш җәңчилириниң һәммиси афғанлар. Уларниң ичидә чәтәллик йоқ” дегән. Хитайниң уйғурларға қарита “ирқий қирғинчилиқ” қилиши хәлқараниң болупму ғәрб дөләтлириниң көңүл бөлүши вә тәнқид қилишиға учраватқан шундақла талибан хитай билән һәмкарлишишни үмид қиливатқан бир вақитта, даишниң партлитишни “уйғур елип барди” дейиши диққәт қозғиғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт