Pakistan talibanliri: “Xitay ‛baj‚ tapshurmisa, ‛bir belwagh bir yol‚ liniyesige hujum qilimiz”

Washin'gtondin muxbirimiz uyghar teyyarlidi
2023.11.29

En'gliye “Kündilik télégraf géziti” ning 11-ayning 25-kündiki xewirige qarighanda, pakistan talibanliri xitay hökümiti %5 “Qurulush béji” tapshurmisa, “Bir belwagh we yol” türlirige hujum qilidighanliqi toghrisida tehdit salghan. Talibanning gendapur guruppisining qomandani sinliq uchurda, xitaydin ereb déngizigha tutishidighan tashyol we tömür yol qatarliq 3218 kilométir uzunluqtiki ul eslihe türi bolghan junggo-pakistan iqtisadiy karidorining weyran bolidighanliqini agahlandurghan.

2021-Yili, xitay inzhénérliri we ishchiliri pakistanda hujumgha uchrighan bolup, qurulush meydanigha xizmetchiler toshughan aptobus partlap, 9 xitay ishchini öz ichige alghan 12 adem qaza qilghanidi.

Bu yil 1-ayda, balujistanliqlar xitay eng köp meblegh salghan gwadar portining qurulushigha naraziliq bildürüp, “Gwadarning heqqini ber” herikiti qozghighan bolup, namayishchilar bilen pakistan saqchiliri otturisida toqunush yüz bergenidi.

Pakistanning gherbiy jenubidiki balujistan ölkisi mol kan bayliqi we déngiz qirghiqining uzunluqi bilen tonulghan, iran we afghanistan bilen chégralinidighan eng chong ölke bolup, pakistan talibanlirining bu rayondiki qoralliq küchlerning biri ikenliki melum. Qoralliq hujumlarning künséri köpiyishige duch kelgen pakistan da'irilirining xitaygha tehdit dep qaralghan bu xewpni yoqitishqa charisiz qalghanliqi bilinmekte.

Afghanistan we pakistanning rayonluq bixeterlik mutexessisi abdul seyid mundaq dégen: “Talibanlarning asasliq kirim menbesi bashqilarni qaqti-soqti qilish. Yéqinda taliban hökümet emeldarliri höddigerler we shirketlerge ‛baj tapshurush‚ toghruluq tehdit saldi”.

Wilson merkizi aqillar ambiri jenubiy asiya institutining mudiri maykél kugélman “Junggo-pakistan iqtisad karidori” ning milliy bölgünchiler we islam radikallirining qosh tehditi astida ikenlikini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.