Афғанистан вәзийити америка-хитай рәһбәрлири үчүн муһим мәсилиләрдин болуп қалди

Талибан күчлириниң пайтәхт кабулни ишғал қилип һакимийәтни қолға алғанлиқи пүтүн дуняниң диққитини қозғаватқанда, бу мәсилә америка-хитай рәһбәрлири үчүнму муһим хизмәт темилиридин болуп қалди. 

Ройтерс агентлиқиниң 16-авғусттики хәвиридә ейтилиишчә, хитай ташқий ишлар министири ваң йи америка армийәсиниң тез сүрәттә афғанистандин қошун чекиндүришини нөвәттики афғанистан вәзийитиниң яманлишип кетишидики түп сәвәб, дәп көрсәткән. У бу сөзни америка ташқий ишлар миниситири антони билинкен билән сөзләшкәндә тилға алған. У алаһидә қилип “қорал күчи арқилиқ охшимиған мәдәнийәт вә тарих арқа көрүнишигә игә болуватқан бир райондики мәсилини һәл қилиш мумкин әмәс. Бундақ урунуш әксичә әһвални техиму яманлаштуриветиду,” дегән. 

Хәвәрдә ейтилишичә, ваң йи өз сөзидә америка һөкүмитиниң “шәрқий түркистан ислам һәркити” тәшкилатини терорлуқ гуруһлар тизимликидин өчүривәткәнликини тәнқидлигән. Һалбуки, америка һөкүмити бундақ бир тәшкилатниң мәвҗут әмәсликини, шундақла хитай һөкүмитиниң уйғурларни бастуруш үчүн мушундақ бир ялған баһанә-сәвәбни тоқуп чиққанлиқини дәп келиватқан иди. 

Америка президенти җов байденму 16-авғуст күни афғанистан вәзийитидики җиддий өзгиришләр түпәйлидин ақсарайда мухбирларни күтүвелиш йиғини чақирған. У сөзидә талибанларниң һакимийәтни тартивалғанлиқини әйибләш билән биргә афғанистан рәһбәрлири вә афғанситан армийәсиниң қораллиқ талибанлар билән ‍уруш қилишни халимиғанлиқини кәскин тәнқидлиди.