Afghanistan weziyiti amérika-xitay rehberliri üchün muhim mesililerdin bolup qaldi

• Muxbirimiz eziz
  2021-08-17

Taliban küchlirining paytext kabulni ishghal qilip hakimiyetni qolgha alghanliqi pütün dunyaning diqqitini qozghawatqanda, bu mesile amérika-xitay rehberliri üchünmu muhim xizmet témiliridin bolup qaldi. 

Roytérs agéntliqining 16-awghusttiki xewiride éytili'ishche, xitay tashqiy ishlar ministiri wang yi amérika armiyesining téz sür'ette afghanistandin qoshun chékindürishini nöwettiki afghanistan weziyitining yamanliship kétishidiki tüp seweb, dep körsetken. U bu sözni amérika tashqiy ishlar minisitiri antoni bilinkén bilen sözleshkende tilgha alghan. U alahide qilip “Qoral küchi arqiliq oxshimighan medeniyet we tarix arqa körünishige ige boluwatqan bir rayondiki mesilini hel qilish mumkin emes. Bundaq urunush eksiche ehwalni téximu yamanlashturiwétidu,” dégen. 

Xewerde éytilishiche, wang yi öz sözide amérika hökümitining “Sherqiy türkistan islam herkiti” teshkilatini térorluq guruhlar tizimlikidin öchüriwetkenlikini tenqidligen. Halbuki, amérika hökümiti bundaq bir teshkilatning mewjut emeslikini, shundaqla xitay hökümitining Uyghurlarni basturush üchün mushundaq bir yalghan bahane-sewebni toqup chiqqanliqini dep kéliwatqan idi. 

Amérika prézidénti jow baydénmu 16-awghust küni afghanistan weziyitidiki jiddiy özgirishler tüpeylidin aqsarayda muxbirlarni kütüwélish yighini chaqirghan. U sözide talibanlarning hakimiyetni tartiwalghanliqini eyiblesh bilen birge afghanistan rehberliri we afghansitan armiyesining qoralliq talibanlar bilen ‍urush qilishni xalimighanliqini keskin tenqidlidi.