Xitay afghanistanning taliban hökümitini “Shara'it pishship yétilgende étirap qilimiz” dégen

Muxbirimiz erkin
2022-04-01

Xitay afghanistandiki talibanlarni “Shara'it pishship yétilgende” afghanistanning “Qanunliq hökümiti” dep étirap qilidighanliqini bildürgen.

Xitayning enxuy ‍ölkiside ‍ötküzülgen afghanistan mesilisi heqqidiki ikki künlük yighinning 31-mart küni axirlashqan yépilish murasimida xitay tashqiy ishlar ministiri wang söz qilip, yuqiriqi nuqtini tekitligen. U afghanistanning xelq'ara jem'iyettin yeklenmesliki kéreklikini éytqan. Xitay hazirgha qeder talibanlarni afghanistanning “Qanunliq hökümiti” dep étirap qilmighan bolsimu, biraq u talibanlar bilen izchil qoyuq munasiwetni saqlap kelgen.

Wang yining éytishiche, taliban hökümiti bashqa döletler bilen bolghan munasiwette ‍ijabiy xaraktér ipadilep kelgen bolsimu, biraq qoshna döletler talibanlarning térorluqqa qarshi turush, étnik guruppilar ara yarishish, keng qatlamliq hökümet hemde ayallar we balilarning heq-hoquqini qoghdashta téximu köp ilgirlesh hasil qilishini kütidiken. Wahalenki, Uyghur ayallirining tughushini pilanliq we sistémiliq cheklep, Uyghur perzentlirini a'ilisidin ayrip, irqiy qirghinchiliq qilish bilen eyiblinip kéliwatqan xitay hökümiti, talibanlar bilen bolghan munasiwette izchil Uyghurlarning afghanistanda pa'aliyet qilishini chekleshni aldinqi shert qilip kelgen.

Talibanlarmu afghanistanda xitaygha qarshi heriketlerge yol qoymaydighanliqi heqqide xitaygha wede bergen. Mezkur yighinda wang yi yene taliban hökümitining “Dawamliq mezmut qedem we toghra yölinishke qarap konkirét tirishchanliqlarni körsitishi” ni telep qilghan. Afghanistan tashqiy ishlar ministiri amir xan muttaqi 31-mart wang yi bilen körüshkende, chet el küchlirining afghanistandin paydilinip bashqa döletlerge qarshi turushigha yol qoyulmaydighanliqini éytqan. Rusiye ukr'inagha qoralliq tajawuz qilghan bir waqitta ötküzülgen bu yighin'gha amérika, rusiye wekillirimu qatnashqan.