Tarim néfitlikining mehsulat miqdari 30 milyon tonnidin éship ketti

“Xitayning eng chong énérgiye ambiri” dep ‍atiliwatqan Uyghur diyaridiki tarim néfitlikidin 2020-yili jem'i 30 milyon tonna néfit-gaz wezni qimmitide néft we tebi'iy gaz qéziwélin'ghan bolup, buning omumi qimmiti 10 milyard amérika dolliri (65 milyard xitay somi)din ashidiken. Bu xitayning 2020-yili déngizdin qéziwalghan bir yilliq néfit miqdarining yérimigha toghra kélidiken.

“Xitay xewerliri” torining 22-dékabirdiki xewiride éytili'ishche, xitay hökümitining néfit sana'iti “Sherqiy qisimda muqimliq, gherbiy qisimda tereqqiyat” dégen istratégiye boyiche Uyghur diyarida néfit qézip kelmekte iken. Xewerde éytilishiche, tarim néftlikidin qéziwélin'ghan néft-gaz wezni qimmiti 2000-yili besh milyon tonna bolghan bolup, ötken üch yilda yiligha besh milyon tonnidin éship mangghan. 2035-Yiligha barghanda bolsa bu sanning 50 milyon tonnigha yetküzilidighanliqi nishan qilinmaqta iken.

Gerche tarim néfitlikidiki néft zapisi xitayning quruqluq néft zapisining üchtin ikki qismini teshkil qilsimu, analizchilar yerlik Uyghurlarning izchil xitaydiki eng namrat turmush sewiyiside yashap kelgenlikini tenqidlep kelmekte iken. Yene beziler bolsa xitay hökümitining Uyghurlarni basturushini “Néft bayliqining qoldin kétip qélishidin endishe qilghanliq” dep qarimaqtiken.