Xitay da'irilirining 3 yilda tarim wadisidiki toghraqliqlarni eslige keltürüshni pilanlishi diqqet qozghimaqta

Muxbirimiz irade
2019-03-05
Élxet
Pikir
Share
Print

Tengritagh torining xewiridin qarighanda, Uyghur rayon da'iriliri tarim wadisida jiddiy muhit bulghinishni azaytish we ékologiyelik tengpungluqni eslige keltürüsh üchün heriketke ötken.

Xewerdin qarighanda, xitay da'iriliri 2019-yilidin 2021-yilighiche bolghan 3 yil ariliqta tarim wadisidiki toghraqliqlarni eslige keltürüp, rayonning tebi'iy muhitini qismen bolsimu yaxshilashni közlimektiken. Bu xizmette asasliq tarim deryasi we uning tarmaq éqinliri bolghan yeken deryasi, aqsu deryasi, xoten deryasi we könchi deryasi qatarliq 4 derya boyidiki toghraqliqlar asasiy nishan qilinidiken.

Xitay axbarat wasitiliri ilgiri élan qilghan xewerliride, 1950-yilidin buyan rayondiki bayliq menbelirini heddidin ziyade échish we ishlitish sewebidin tarim deryasigha tutushidighan köp sandiki derya éqinliri qurup ketkenliki, yer asti süyi körünerlik töwenlep ketkenliktin zor miqdardiki toghraqliqlarni qum bésip we qurup ketkenlikini étirap qilghan idi.

Tarixi menbelerdin qarighanda, 1950-yillardin étibaren, xitay hökümiti ishlepchiqirish qurulush armiyesi 1-déwiziyesining 16 polki tarim deryasining yuqiri éqini rayoni, yeni aral qatarliq rayonlarni merkez qilip, korlani asas qilip yerleshtürülgen, 2-déwiziyening 14 polki bolsa korlani asas qilip, deryaning ottura we töwen éqinliri rayonini kontrol qilghan iken. Ene shular jaylashqan rayonlardiki nurghun toghraqliqlar qurup ketken.

Xitayning shinxu'a tori tarqatqan bir xewiride, Uyghur élidiki tetqiqatchilarning Uyghur élidiki gurbantun'gut qumluqida we ürümchining etrapida ösidighan bir xil qisqa ömürlük ösümlükni tetqiq qilip, ösümlüklerning qumluqlarda we su mol bolghan oxshimighan shara'itlarda ösüsh ehwalini tetqiq qilip, buning siri heqqide netije hasil qilghanliqini bildürgen.

Xitay hökümitining Uyghur élidiki qumluqlarda we tarim derya boyidiki toghraqliqlarni eslige keltürüshke bunche ehmiyet bérishi közetküchilerning diqqitini qozghap kelmekte.

Ularning qarishiche, xitay merkizi hökümiti 2016-yilidin buyan Uyghur diyaridiki su qurulushi we kökertish ishlirigha ehmiyet bérishke bashlighan bolup, buning üchün zor kölemde meblegh ajratqan, közetküchiler buning xitay mutexessisliri otturigha qoyghan tibet égizlikidiki yarluzangbu deryasining süyini teklimakan'gha bashlap, kelgüside bu rayon'gha zor sanda ahale orunlashturush layiheliri bilen munasiwetlik bolushi mumkinlikini perez qilishmaqta.

Toluq bet