Xitay da'iriliri Uyghur tarixiy miraslirining ornigha “Qizil wetenperwerlik terbiye baziliri” ni dessetmekte

Xitay da'iriliri Uyghur élida Uyghurlarning tarixiy medeniyet miraslirini yoqitish bilen bir waqitta, ‍özining “Qizil wetenwerlik terbiye baziliri” ni berpa qilishni kéngeytmekte. Melum bolushiche, xitay da'iriliri yéqinda Uyghur élidiki yene 15 orunni aptonom rayon derijilik xitay “Wetenperwerlik terbiye bazisi” qilip békitken. Bu 15 orun xitay da'irilirining Uyghur rayonida “Wetenperwerlik terbiyesi bazisi” qilip békitken 4-türkümdiki “Qizil tarixy mirasliri” bolup hésablinidiken.

Xitay da'iriliri 2017-yili bashlan'ghan chong tutqunda az digende bir milyon 800 ming Uyghurni lagér, türmilerge qamash, Uyghurlarning nupusni cheklesh, Uyghur medeniyitini weyran qilish, a'ililirini parchilash bilen bir waqitta, xitayning “Wetenperwerlik terbiyesi baziliri” ni keng kölemde qurushqa bashlap, Uyghurlarning tarixi we medeniyitini inkar qilishqa kirishken. Bu jeryanda Uyghurlarning nurghun tarixiy mirasliri, meschit we uzaq tarixqa ige en'eniwiy qurulushliri chéqip tashlan'ghan idi.

“Shinjang géziti” ning xewer qilishiche, xitayning 4-türkümdiki “Wetenperwerlik terbiyesi bazisi” qilip békitilgen bu orunlar qeshqer uniwérsitétining “Idiyewi siyasi terbiyelesh merkizi”, “Küre inqilabi qurbanlar qebristanliqi”, qeshqer muziyi, uchturpan qongghuraq rawiqi, malen herbiy körgezmisi, xitay armiyesining guma nahiyesidiki herbiy qebristanliqi shundaqla ötken yili tumshuq shehrige qurulghan “Tang xandanliqining boz yer échish medeniyiti tejribe merkizi” qatarliq orunlarni öz ichige alghan iken.