Татаристанда сиясий панаһлиқ тилигән қош кезәк ака-ука уйғур татарлири хитайға қайтурулуш хәвпигә дуч кәлгән

Мухбиримиз әркин
2019-10-09
Елхәт
Пикир
Share
Принт

Русийәдики татаристан җумһурийитиниң қазан шәһиридә сиясий панаһлиқ тиләп, панаһлиқ илтимасини рәт қилинған қош кезәк ака-ука уйғур татарлар хитайға қайтурулуш хәвпигә дуч кәлгән.

Русийәдики «москва вақти» гезитиниң хәвәр қилишичә, үрүмчидә туғулған 23 яшлиқ ака-ука уйғур татарлиридин шәһризат шавкәт билән шаһдияр шавкәтниң сиясий панаһлиқ илтимаси русийә сот мәһкимиси тәрипидин рәт қилинған болуп, нөвәттә улар сотниң қарариға наразилиқ билдүрүп әрз сунған. Әмма ларниң адвокати зөһрә һәмрайева, русийә хитайниң уйғур районидики қилмишлирини етирап қилмайдиғанлиқи, шуңа уларниң сиясий панаһлиқ илтимасиниң қобул қилиниши мүшкүлгә тохтайдиғанлиқини билдүргән.

Русийә бу йил б д т кишилик һоқуқ кеңишигә хәт йезип, хитайниң уйғур районида «террорлуққа қарши туруш көрүшидә зор утуқларға еришкәнлики» ни илгири сүргән 37 дөләтниң бири иди. «Москва вақти гезити» ниң билдүрүшичә, шәһризат шавкәт вә шәһрияр шавкәтниң дадиси уйғур, аниси татар болуп, нөвәттә ата-анисиниң һәр иккиси лагерға елип кетилгән. Шәһризат билән шәһрияр 2015‏-йили қазанға келип, русийәдики нопузлуқ университетларниң бири болған «федератсийә университети» ға оқушқа киргән. Бирақ өткән йили визисиниң вақти тошуп кәткәчкә университет уларни оқуштин тохтатқан.

Уларниң «москва вақти» гезитигә билдүрүшичә, хитайниң беларусийәдики консулханиси бу йил 1-айда уларға визисини пәқәт хитайға қайтип берип, шу йәрдә узарталайдиғанлиқини билдүргән. Әмма шәһризат вә шәһрият хитайға қайтип барса өзлириниң башқа уйғур достлириға охшаш лагерға қамилишидин әндишә қилмақта икән. Улар қайтип барса, өзлириниң телефон екранидики «уйғурларға әркинлик» дегән сөзниң өзила аваричиликкә қелишиға сәвәб болидиғанлиқини билдүргән.

«Москва вақти» гезитиниң билдүрүшичә, нөвәттә шәһрияр билән шәһризат ениқсиз бир келәчәккә дуч кәлгән болсиму, лекин улар давамлиқ қазанда турушни қарар қилған. Уларниң адвокати зөһрә һәмрайева, әгәр русийә сот мәһкимиси уларниң илтимасини йәнә рәт қилса, явропа кишилик һоқуқ сот мәһкимисигә әрз қилишни пиланлимақтикән.

Пикирләр (0)
Share
Толуқ бәт