Tataristanda siyasiy panahliq tiligen qosh kézek aka-uka Uyghur tatarliri xitaygha qayturulush xewpige duch kelgen

Muxbirimiz erkin
2019-10-09
Élxet
Pikir
Share
Print

Rusiyediki tataristan jumhuriyitining qazan shehiride siyasiy panahliq tilep, panahliq iltimasini ret qilin'ghan qosh kézek aka-uka Uyghur tatarlar xitaygha qayturulush xewpige duch kelgen.

Rusiyediki "Moskwa waqti" gézitining xewer qilishiche, ürümchide tughulghan 23 yashliq aka-uka Uyghur tatarliridin shehrizat shawket bilen shahdiyar shawketning siyasiy panahliq iltimasi rusiye sot mehkimisi teripidin ret qilin'ghan bolup, nöwette ular sotning qararigha naraziliq bildürüp erz sun'ghan. Emma larning adwokati zöhre hemrayéwa, rusiye xitayning Uyghur rayonidiki qilmishlirini étirap qilmaydighanliqi, shunga ularning siyasiy panahliq iltimasining qobul qilinishi müshkülge toxtaydighanliqini bildürgen.

Rusiye bu yil b d t kishilik hoquq kéngishige xet yézip, xitayning Uyghur rayonida "Térrorluqqa qarshi turush körüshide zor utuqlargha érishkenliki" ni ilgiri sürgen 37 döletning biri idi. "Moskwa waqti géziti" ning bildürüshiche, shehrizat shawket we shehriyar shawketning dadisi Uyghur, anisi tatar bolup, nöwette ata-anisining her ikkisi lagérgha élip kétilgen. Shehrizat bilen shehriyar 2015‏-yili qazan'gha kélip, rusiyediki nopuzluq uniwérsitétlarning biri bolghan "Fédératsiye uniwérsitéti" gha oqushqa kirgen. Biraq ötken yili wizisining waqti toshup ketkechke uniwérsitét ularni oqushtin toxtatqan.

Ularning "Moskwa waqti" gézitige bildürüshiche, xitayning bélarusiyediki konsulxanisi bu yil 1-ayda ulargha wizisini peqet xitaygha qaytip bérip, shu yerde uzartalaydighanliqini bildürgen. Emma shehrizat we shehriyat xitaygha qaytip barsa özlirining bashqa Uyghur dostlirigha oxshash lagérgha qamilishidin endishe qilmaqta iken. Ular qaytip barsa, özlirining téléfon ékranidiki "Uyghurlargha erkinlik" dégen sözning özila awarichilikke qélishigha seweb bolidighanliqini bildürgen.

"Moskwa waqti" gézitining bildürüshiche, nöwette shehriyar bilen shehrizat éniqsiz bir kélechekke duch kelgen bolsimu, lékin ular dawamliq qazanda turushni qarar qilghan. Ularning adwokati zöhre hemrayéwa, eger rusiye sot mehkimisi ularning iltimasini yene ret qilsa, yawropa kishilik hoquq sot mehkimisige erz qilishni pilanlimaqtiken.

Toluq bet