Xitay da'iriliri bu yil yene Uyghurlarni "Tawuz chaghini" ötküzüshke uyushturghan

Muxbirimiz erkin
2021-09-20
Share

Xitay da'iriliri bu yil yene Uyghurlarni keng kölemlik xitayning en'eniwi milliy bayrimi bolghan "Tawuz chaghini" ni ötküzüshke uyushturghan. Xitay taratqulirining ashkarilishiche, xitayning 21-séntebir yétip kélidighan "Tawuz chaghini" harpisida Uyghur élining jenubiy we shimalidiki yéza-kentlerde töwen'ge chüshken xizmet etretliri yerlik musulman xelqlerni xitayning mezkur bayrimini kütüwélish üchün her xil pa'aliyetlerge teshkillen'gen.

"Shinjang géziti" ning bu heqtiki bir xewiride, xotenning jiya yézisidiki bir kentke chüshken xizmet etritining shyaw famililik bir mu'awin etret bashliqi bu kentte 17-séntebir ötküzülgen pa'aliyette "Xizmet etritidikiler bilen kent ahalisining birlikte aytoqach yasighanliqi", pa'aliyetning "Nahayiti menilik" ‍ötkenlikini ilgiri sürgen.

Xitay hökümiti 2017-yili bashlan'ghan we bezi gherb döletliri teripidin "Irqiy qirghinchiliq" dep qaralghan chong tutqun bilen bir waqitta, Uyghur we bashqa musulmanlarning diniy hem milliy bayramlirini cheklep, ularni xitayning "Tawuz chaghini", "Bahar bayrimi" dégendek milliy bayramlirini ötküzüshke uyushturup kelgen.

Da'iriler bu pa'aliyetlerni Uyghurlar bilen xitaylar arisidiki "Qoshmaq tughqanchiliqni kücheytish we téximu chongqurlashturush" namida qanat yaydurulup kelgen. Biraq Uyghur teshkilatliri xitayning Uyghurlarni "Chaghan" we "Tawuz chaghini" dek bayramlarni kütüwélishqa mejburlishi uning Uyghurlargha qarita élip barghan "Irqiy qirghinchiliqi" we assimilyatsiye herikitining parchisi ikenlikini ilgiri sürüp keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet