Tayland parlaménti kishilik hoquq komitéti taylandtiki 48 Uyghurning salametlik ehwalidin endishe qiliwatqanliqini bildürgen

Tayland parlaménti kishilik hoquq komitéti nöwette tayland hökümitining mu'awin bash ministiri bilen uchriship, 2013-yildin buyan taylandta tutup turuluwatqan 48 Uyghurning ehwalini yaxshilash heqqide muzakire qilmaqchi bolghan.

Taylandning in'glizche xewerler tori bolghan “Tayland döliti” (Nation Thailand) -29yanwar élan qilghan xewerge köre, tayland kéngesh palata ezasi we kishilik hoquq komitétining re'isi angxana nélapajit (Anghana Neelapaijit) bashchiliqidiki komitét ezaliri taylandning mu'awin bash ministiri pumtam wichayacha (Phumtham )bilen körüshüp, taylandta tutup turuluwatqan 48 Uyghurning salametlik ehwalini tekshürüsh, dawalash hemde ularning shara'itini yaxshilashni muzakire qilmaqchi bolghan.

Komitét re'isi angxana nélapajit taylanda achliq élan qilip ajizlap ketken Uyghur musapirlirining ehwalidin ensireydighanliqi bildürüp: “Komitétimiz tayland hökümitining u musapirlarni uzun muddet baqalmasliqidin, bashqurush jehettiki yétersizlikidin endishe qilmaqta” dégen. U xelq'ara qizil kirést jem'iyitini bu ishqa yéqin turushqa tewsiye qilidighanliqini bildürgen. U yene tayland hökümitining özining xelq'ara mejburiyitini ada qilip, bu musapirlarni xeterlik jaygha yollimasliqqa kapaletlik qilidighanliqini bildürgenlikini éytqan.

Köpligen kishilik hoquq organliri taylandta tutup turuluwatqan 48 neper Uyghurni xitaygha qayturushqa qarshi küchlük inkas bildürgen bolup, birleshken döletler teshkilatimu taylandni bu pilanidin waz kéchishke, xelq'ara kishilik hoquq nizamigha emel qilishqa chaqirghanidi. Nöwette fésbok qatarliq ijtima'iy alaqe supilirida, taylandiki Uyghurlarning xitaygha qayturulmaydighan bolghanliqi heqqide xewerler tarqalmaqta.