Tayland hökümiti tashqi dunyagha Uyghurlarni qayturmaymiz dep, yeng ichide ularni qayturush qararini élip bolghan

Tayland hökümet emeldarliri bu yilning bashliri mezkur dölette tutup turulghan Uyghurlarni xitaygha qayturup bermeymiz dep köp qétim wede bergen bolsimu, emma 27-féwral küni Uyghurlardin 40 nepirini xelq'araning naraziliqigha qarimay xitaygha qayturup bergen idi.

Amérika birleshme agéntliqi ning 24-marttiki xewiride éytilishiche, gerche tayland hökümiti xelq'aragha bu Uyghurlarni qayturmaymiz dep kelgen bolsimu, emeliyette ularni qayturushi xéli burunla békitilgen ish iken.

Xewerde bildürülüshiche, tayland bash ministiri pétongtarin shinawatra bultur yil axirida xitay re'isi shi jinping bilen körüshkendin kéyinla, tutup turush ornidiki Uyghurlarning ehwalida özgirish yüz bérishke bashlighan. Mezkur ziyarettin bir ay ötüp, xitay hökümiti Uyghurlarni qayturup kélish toghrisida taylandqa iltimas sun'ghan we bu mesile tayland hökümiti teripidin mexpiy muzakire qilinishqa bashlan'ghan iken.

8-Yanwar küni tutup turush ornidiki Uyghurlardin qayturush höjjetlirige imza qoyush telep qilin'ghan we ulargha tehdit sélin'ghan. Ular achliq élan qilish arqiliq qutquzushni telep qilghan.

Xewerde éytilishiche, emeliyette taylandning Uyghurlarni qayturuwétish qarari 17-yanwardila mexpiy halda békitip bolun'ghan bolup, hökümet metbu'atlargha, parlamént ezalirigha we teshkilatlargha bundaq pilanning yoqluqini éytip yalghan bayanatlar bergen. Hetta bu toghrisida 2 qarar sotmu échilip, bu Uyghurlarning teqdiri toghrisida téxi éniq höküm chiqmighan idi.

Tayland hökümet emeldarliri 18-marttin 20-martqiche Uyghur élige bérip, qayturuwétilgen Uyghurlardin peqet altisi bilenla körüshken. Ular bu Uyghurlarning “Xushal-xuram yashawatqanliqi” ni éytqan bolsimu, bu ziyaretler qattiq cheklimiler astida élip bérilghan.