Uyghur élini ziyaret qilghan tayland emeldarliri xitayning nachar obrazini yaxshilash herikitige yantayaq bolghan

“Tayland olusi” (The Nation Thailand) xewer torining 20-mart xewirige asaslan'ghanda, taylandning mu'awin bash ministiri, qoshumche dölet mudapi'e ministiri wachayachay bilen edliye ministiri tawé sodsong bashchiliqidiki tayland hökümet wekiller ömiki bügün héytgah jamisini ziyaret qilghan. Jamining imami taylandtin xitaygha mejburiy qayturulghan 40 neper Uyghurning “A'ilisidikiler bilen xushal halda jem bolghanliqi, xitay hökümitining ulargha yaxshi köngül bölüwatqanliqi we ularning normal turmush kechürüshige kapaletlik qilghanliqi” ni tekitligen.

Kishilik hoquqni közitish teshkilati (HRW) 18-mart küni bayanat élan qilip, nöwette Uyghur élini ziyaret qiliwatqan tayland wekiller ömikining xitay hökümiti teyyarlap qoyghan naxsha-ussul we yaltiraq sehnilirige aldanmasliqi, shundaqla xitayning nachar obrazini yaxshilash herikitige yantayaq bolmasliqi heqqide agahlandurghan idi. Ular yene tayland wekiller ömikidin xitayning Uyghurlargha qilghan ziyankeshliki we Uyghur élidiki kishilik hoquq depsendichiliki toghrisida ashkara axbarat élan qilishni telep qilghan idi.

Kishilik hoquqni közitish teshkilati xitay ishliri bölümining mu'awin diréktori maya wang, tayland emeldarlirining Uyghur élidiki ziyariti heqqide radiyomizgha qilghan sözide tayland hökümitining hélihem xitaygha masliship teshwiqat oyuni oynawatqan bolushi mumkinliki heqqidiki endishilirini otturigha qoyghan idi.

Tayland hökümitining 27-féwral küni 40 neper Uyghurni xitaygha mexpiy qayturup bérishi ashkarilan'ghandin kéyin, muhajirettiki Uyghurlar, kishilik hoquq teshkilatliri, shundaqla amérikani öz ichige alghan bir qisim démokratik döletlerning küchlük naraziliqi we eyiblishige uchrighanidi. Amérika tashqi ishlar ministiri marko rubiyo taylandning bu herikitini “Eng qattiq ibariler bilen eyibleydighanliqini” jakarlash bilen birge, Uyghurlarni xitaygha mejburiy qayturushta mes'uliyiti bar tayland emeldarlirigha wiza émbargosi qoyulidighanliqini élan qilghanidi.