Taylandtiki türmidin qachqan Uyghurlardin 3 nepirining qolgha chüshkenliki xewer qilinmaqta

• Muxbirimiz irade
  2019-02-14

Taylandning “Xasod xewerliri” gézitining xewer qilishiche, taylandtiki türmidin qachqan 7 neper Uyghurning üch nepiri qolgha chüshken. Tayland saqchi da'iriliri peyshenbe künidiki bayanatida qalghan töt neper Uyghurni hélihem tayland chégrasi ichide dep qaraydighanliqini, ularning belkim etrapta yémek-ichmek izdep yürgen bolushi mumkinlikini bildürgen.

Nöwette ularning weziyiti chet'ellerdiki Uyghurlarning qattiq endishisini qozghimaqta. Dunya Uyghur qurultiyining bayanatchisi dilshat rishit bu heqte toxtilip, “Tayland hökümiti ularning bixeterlikige, bolupmu ularning xitaygha qayturulmasliqigha kapaletlik qilishi kérek,” dédi. 

12-Féwral, yeni seyshenbe küni tayland taratquliri taylandning mukdaxan ölkisidiki musapirlarni tutup turush ornida 2016-yili 6-aydin bashlap tutup turuluwatqan Uyghur tutqunlardin 7 nepirining türmidin qachqanliqini xewer qilghan idi. Yuqiriqi xewerlerde taylandta yene 50 neper Uyghur musapirning barliqi qeyt qilin'ghan. 
2014-Yilidin buyan 300 ge yéqin Uyghur musapir taylandta tutulup “Chégradin qanunsiz kérish jinayiti” bilen türmige tashlan'ghan idi. Bulardin 175 neper kishi türkiyege yerleshtürülgen bolsimu, yene 100 din artuq Uyghur xitaygha qayturup bérilip xelq'araliq eyibleshke uchrighan. 

Bundin sirt yene 2018-yil awghustta 27 yashliq bilal isimlik Uyghur yigitimu taylandtiki 4 yilliq tutqunluq mudditide késellik sewebi bilen hayatidin ayrilghan idi. Xelq'ara kishilik hoquq organliri we dunya Uyghur qurultiyi qatarliqlar tayland hökümitini musapir Uyghurlarni derhal qoyup bérip, ularning üchinchi bir döletke salamet orunlishishigha kapaletlik qilishqa chaqirip kelmekte.