Ikki neper Uyghurning taylandtiki köchmenler tutup turush ornidin qéchip ketkenliki xewer qilindi

Taylandiki köchmenler tutup turush ornida tutup turuluwatqan ikki neper Uyghurning qéchip ketkenliki melum. “Banngkok pochtisi” gézitining bu heqtiki xewiridin qarighanda, 41 yash we 29 yashliq bolghan ikki neper Uyghur charshenbe küni, yeni 14-öktebir küni taylandning maysot rayonidiki köchmenler tutup turush ornidin qéchip ketken. Xewerde ular üstidin jiddiy tutush buyruqi chiqirilip, chégra charlash saqchiliri, yerlik saqchi we eskerlerning 14-küni tutup turush merkizining arqisidiki kömmiqonaq étizliqlirini axturghanliqi bayan qilin'ghan.

Melum bolushiche, bu ikkiylen ilgiri nongxey ölkisidiki köchmenler tutup turush merkizidinmu qéchip kétip, 21 kündin qayta qolgha chüshürülgen bolup, ular shundin kéyin hazirqi maysot rayonidiki tutup turush ornigha yötkep kétilgen iken.

Bu ikki Uyghurning qéchip ketkenliki taylandtiki axbaratlarda xewer qilin'ghandin kéyin, Uyghurlar we Uyghur teshkilatlirini endishige chömdürdi. Uyghur teshkilatliri tayland da'irilirini bu Uyghurlarning musapirliq hoquqlirigha we bixeterlikige kapaletlik qilishini telep qildi.

2015-Yili 8-iyul küni tayland da'iriliri xitayning bésimigha bash égip, 109 neper Uyghurni bashlirigha qara xalta kiydürülgen, qolliri kishenlen'gen halda banngkok herbiy ayrodromi arqiliq xitaygha qayturuwetken.

Taylandtiki Uyghur musapirlarning paji'esi buning bilen tügimidi. Aridin 5 yil ötkendin kéyinki bügünki künde yenila 54 neper Uyghur musapir taylandning oxshimighan jayliridiki türme we musapirlar lagérlirida erkinliktin mehrum we teqdirining qandaq bolidighanliqi téxi éniq bolmighan halda turmaqta.