Икки нәпәр уйғурниң тайландтики көчмәнләр тутуп туруш орнидин қечип кәткәнлики хәвәр қилинди

Мухбиримиз ирадә
2020-10-15
Share

Тайландики көчмәнләр тутуп туруш орнида тутуп турулуватқан икки нәпәр уйғурниң қечип кәткәнлики мәлум. «Банңкок почтиси» гезитиниң бу һәқтики хәвиридин қариғанда, 41 яш вә 29 яшлиқ болған икки нәпәр уйғур чаршәнбә күни, йәни 14-өктәбир күни тайландниң майсот районидики көчмәнләр тутуп туруш орнидин қечип кәткән. Хәвәрдә улар үстидин җиддий тутуш буйруқи чиқирилип, чегра чарлаш сақчилири, йәрлик сақчи вә әскәрләрниң 14-күни тутуп туруш мәркизиниң арқисидики көммиқонақ етизлиқлирини ахтурғанлиқи баян қилинған.

Мәлум болушичә, бу иккийлән илгири ноңхәй өлкисидики көчмәнләр тутуп туруш мәркизидинму қечип кетип, 21 күндин қайта қолға чүшүрүлгән болуп, улар шундин кейин һазирқи майсот районидики тутуп туруш орниға йөткәп кетилгән икән.

Бу икки уйғурниң қечип кәткәнлики тайландтики ахбаратларда хәвәр қилинғандин кейин, уйғурлар вә уйғур тәшкилатлирини әндишигә чөмдүрди. Уйғур тәшкилатлири тайланд даирилирини бу уйғурларниң мусапирлиқ һоқуқлириға вә бихәтәрликигә капаләтлик қилишини тәләп қилди.

2015-Йили 8-июл күни тайланд даирилири хитайниң бесимиға баш егип, 109 нәпәр уйғурни башлириға қара халта кийдүрүлгән, қоллири кишәнләнгән һалда банңкок һәрбий айродроми арқилиқ хитайға қайтурувәткән.

Тайландтики уйғур мусапирларниң паҗиәси буниң билән түгимиди. Аридин 5 йил өткәндин кейинки бүгүнки күндә йәнила 54 нәпәр уйғур мусапир тайландниң охшимиған җайлиридики түрмә вә мусапирлар лагерлирида әркинликтин мәһрум вә тәқдириниң қандақ болидиғанлиқи техи ениқ болмиған һалда турмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.