Тайланд кишилик һоқуқ тәшкилатлири тайланд түрмисидин қачқан уйғурларниң ақивитидин әндишә қилмақта икән

Мухбиримиз әркин
2020-10-16
Share

Тайланд кишилик һоқуқ тәшкилатлири тайланд көчәмәнләр мәркизидин қачқан икки нәпәр уйғур мусапириниң хитайға өткүзүп берилгән яки бермаға өтүп кәткән болуши мүмкинликидин әндишә қилмақта икән.

«Бенар хәвәрлири» ториниң билдүрүшичә, «пуқраларни күчләндүрүш фонди» намлиқ тайланд кишилик һоқуқ тәшкилатиниң директори чалида таҗиронсук: «мән тайланд даирилириниң уларни хитайға өткүзүп бәргән болушидин әндишә қилимән,» дегән.

14-Өктәбир тайландниң так өлкисиниң бермаға чегридаш месод районидики көчмәнләр мәркизидә қамақлиқ икки уйғур мусапири көчмәнләр мәркизидин қачқан. Тайланд даирилири 41 яшлиқ мурат, 29 яшлиқ рашид асим исимлик бу икки уйғур мусапирини тутуш үчүн районда кәң көләмлик ахтуруш башлиған. Тайланд даилириниң билдүрүшичә, мурат билән рашид бурун лаос чеграсидики ноңкай көчмәнләр мәркизигә қамалған болуп, у йәрдин месод көчмәнләр мәркизигә йөткәп келингән икән.

Бу уларниң 2-қетим қечиши болуп, 1-қетим 21 күндин кейин тутулуп қалған.

«Бенар хәвәрлири» ниң тәкитлишичә, қачқунларни тутушқа йетәкчилик қиливатқан бир муавин сақчи башлиқи қачқунларниң бермаға өтүп кетишни пиланлиғанлиқи ениқ икәнликини билдүргән. Лекин кишилик һоқуқ тәшкилатлири берманиң уйғур мусапирлири үчүн техиму хәтәрлик икәнлики, бермада тутулуп қалса хитайға техиму асан өткүзүп берилишидин әндишә қиливатқанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.