Tayland kishilik hoquq teshkilatliri tayland türmisidin qachqan Uyghurlarning aqiwitidin endishe qilmaqta iken

Muxbirimiz erkin
2020-10-16
Share

Tayland kishilik hoquq teshkilatliri tayland köchemenler merkizidin qachqan ikki neper Uyghur musapirining xitaygha ötküzüp bérilgen yaki bérmagha ötüp ketken bolushi mümkinlikidin endishe qilmaqta iken.

"Bénar xewerliri" torining bildürüshiche, "Puqralarni küchlendürüsh fondi" namliq tayland kishilik hoquq teshkilatining diréktori chalida tajironsuk: "Men tayland da'irilirining ularni xitaygha ötküzüp bergen bolushidin endishe qilimen," dégen.

14-Öktebir taylandning tak ölkisining bérmagha chégridash mésod rayonidiki köchmenler merkizide qamaqliq ikki Uyghur musapiri köchmenler merkizidin qachqan. Tayland da'iriliri 41 yashliq murat, 29 yashliq rashid asim isimlik bu ikki Uyghur musapirini tutush üchün rayonda keng kölemlik axturush bashlighan. Tayland da'ilirining bildürüshiche, murat bilen rashid burun la'os chégrasidiki nongkay köchmenler merkizige qamalghan bolup, u yerdin mésod köchmenler merkizige yötkep kélin'gen iken.

Bu ularning 2-qétim qéchishi bolup, 1-qétim 21 kündin kéyin tutulup qalghan.

"Bénar xewerliri" ning tekitlishiche, qachqunlarni tutushqa yétekchilik qiliwatqan bir mu'awin saqchi bashliqi qachqunlarning bérmagha ötüp kétishni pilanlighanliqi éniq ikenlikini bildürgen. Lékin kishilik hoquq teshkilatliri bérmaning Uyghur musapirliri üchün téximu xeterlik ikenliki, bérmada tutulup qalsa xitaygha téximu asan ötküzüp bérilishidin endishe qiliwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet