Tayland saqchiliri türmidin qachmaqchi bolghan 7 Uyghurning délosini sotqa tapshurghan

Muxbirimiz irade
2020-01-24
Share

Tayland saqchi da'iriliri yéqinda taylandning mukdaxan rayonidiki türmidin qéchishqa urun'ghan 7 neper Uyghurning délosini sotqa tapshurghan.

Radiyomizning igilishiche, mukdaxan rayonluq saqchi idarisining xadimi udun chaka'ék bu 7 neper Uyghurning "Musapirlarni tutup turush merkizi" din qéchishqa urun'ghanliqi üchün mukdaxan türmisige yötkelgenlikini we ularning délosining sotqa tapshurulghanliqini éytqan. 

Tayland da'iriliri 10‏-yanwar küni taylandning mukdaxan ölkisige qarashliq mu'ang rayonidiki musapirlar qamaqxanisida tutup turuluwatqan 7 neper Uyghur musapirining qamaqxanidin qachqanliqini élan qilghan. Lékin uzun ötmeyla ularning hemmisi aldi-keyni bolup qolgha chüshken. 

Yuqiriqi saqchi xadimining radiyomizgha éytishiche, bu Uyghurlar "Türmidin qéchishqa urunush jinayiti" bilen ikki yilliq qamaq jazasigha höküm qilinishi mumkin iken. 

Taylandtiki kishilik hoquq organliridin biri bolghan "Xelqni küchlendürüsh fondi jem'iyiti" bashliqi chalida tajaronsok yéqinda bu 7 neper Uyghurni biwaste ziyaret qilghan bolup, u radiyomizgha qilghan sözide bu Uyghurlarning musapirlar merkizidiki intayin nachar shara'itlar tüpeylidin qéchishqa mejbur bolghanliqini éytqan. U sözide "Musapirlarni tutup turush orni tolimu qistangchiliq we shara'iti bek nachar bolghachqa ular qachmaqchi bolghan. U yerde peqet birla dérize bar iken. Ular 4 yildin béri kün körmeywétiptu" dégen. U yene bu Uyghurlarning meqsitining malaysiya we türkiyege kétish ikenlikini tekitligen.

Mukdaxan ölkilik köchmenler da'irilirining bildürüshiche, qamaqxanidin qachqan 7 neper Uyghur musapiri 22-38 yashlar ariliqida bolup, ular hazir taylandtning oxshimighan jayliridiki 4 musapirlar merkizide tutup turuluwatqan jem'iy 50 neper Uyghur tutqunlarning bir qismi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet