Sayahetchilerning "Lopnur tebi'iy qoghdash rayoni" gha bérishining cheklinishi diqqet qozghidi

Muxbirimiz irade
2018-05-10
Élxet
Pikir
Share
Print

"Xitay xewerler tori" ning 9 may küni élan qilghan xewiride Uyghur élidiki "Lopnur tebi'iy qoghdash rayoni" ni muhapizet qilish xizmetlirining bu yil bahar pesildin bashlap kücheytilidighanliqi bildürülgen.

Xewerde éytilishiche, shinjang lopnur yawa tögilirini dölet derijilik tebi'iy qoghdash idarisi bu heqte mexsus uqturush tarqitip, bu jayda kolléktip we shexsi sayahet qilishning cheklinidighanliqini, buninggha xilapliq qilghuchilarning qanun boyiche bir terep qilinidighanliqi, qilmishi éghir bolghanlarning jinayi jawabkarliqqa tartilidighanliqi bildürülgen.

Mezkur uqturush chet'ellerdiki Uyghur közetküchilerning diqqitini qozghidi. Chünki bügün "Lopnur tebi'iy qoghdash rayoni" dep atiliwatqan bu rayon eslide xitay hökümiti 1949 yilidin bashlap 40 qétimdin artuq yadro siniqi élip barghan yadro tejribe bazisi bolup, yadro siniqi bu rayonning su we tupriqini qattiq bulghap, rayondiki yerlik xelqning salametlikige éghir talapetlerni élip kelgen idi.

Emma yillardin béri xitay hökümiti bu heqtiki uchurlarni we musteqil tekshürüshlerni izchil cheklesh bilen birge buni yene awam xelqtinmu mexpiy tutup, ularni bu rayondiki yadro radiyatsiyesining xetiridin agahlandurmay kelgen idi.

"Xitay xewerler tori" da élan qilin'ghan bu heqtiki xewerde bu qétimliq uqturushning sewebini rayondiki yawa tögilerni qoghdash üchün dep körsetken bolsimu, emma Uyghur közetküchiler buning tégide bashqa bir mahiyetlik sewebning bar bolushi mumkinlikini mölcherlimekte.

Qiziqarliqi shuki, bügün atush sheherlik hökümet tori bir uqturush tarqitip, atushtiki barliq idare - organ we mektep orunlirining yéqinda xitay penler akadémiyesi bilen shenshi ölkilik radiyo -téléwiziye idarisi birlikte ishligen téléwiziye filimi "Junggo yadro bombilirining atisi - chyen shösén" dégen filimni körüshske orunlashturghan. Chyen shösén amérikida oqughan xitay alimi bolup, u 1960-yillarda xitayning tunji atom bombisini yasap lopnurda sinaq qilishqa téxnika jehettin yétekchilik qilghan kishidur. Atush sheherlik hökümetning uqturushida bu filimning ichkiri ölkilerde 19- qurultay rohigha asasen alliqachan qoyulup teshwiq qilin'ghanliqi, atushtiki her sahe ammisining bu filimni körüp wetenperwerlik rohini urghutup, "Menggülük eminlik" ni berpa qilish üchün xizmet qilish rohini östürüshi kérekliki bildürülgen.

Toluq bet